काठमाडौँ । नेपाल उद्योग वाणिज्य महासंघका अध्यक्ष चन्द्रप्रसाद ढकालले सरकारले सर्वसाधरणको मनोबल बढाउने नीति ल्याए अर्थतन्त्रको समस्या कम हुनसक्ने बताउनुभएको छ ।
बुधवार काठमाडौंमा भएको एक कार्यक्रममा बोल्दै अध्यक्ष ढकालले सरकार र नियमनकारी निकायहरुले उद्योगी व्यवसायी र जनतालाई आत्मविश्वास बढाउने नीति ल्याएर अर्थतन्त्रका वर्तमान समस्या समाधान उन्मुख हुने बताउनुभएको हो । उहाँले पछिल्लो समय सरकार नियमकारी निकायहरुले निजी क्षेत्रले उठाउँदै आएका समस्या र मागका विषयमा बेवास्था गर्दा अर्थतन्त्रमा समस्या देखिएको बताउनु भयो ।
अध्यक्ष ढकालले सरकारले उद्योगी व्यवसायी र जनतालाई सकारात्मक बनाउने गरी नीति नल्याएसम्म अर्थतन्त्रमा समस्या समाधान हुन नसक्ने दाबी गर्नुभयो । उहाँले नियमनकारी निकाय राष्ट्र बैंकले मौद्रिक नीति र सरकारले बजेटमा निजी क्षेत्रको माग सम्बोधन गर्न नसक्दा अर्थतन्त्रमा प्रभाव परेको धारणा राख्नुभयो । उहाँले निजी क्षेत्रका तीन वटा संस्थाहरुले सरकारले ल्याउने बजेट र मौद्रिक नीतिमा एउटै स्वरमा सुझावहरु दिँदा समेत कार्यान्वयनमा आउन नसक्नु भनेको सरकारको निजी क्षेत्रलाई हेर्नु दृष्टिकोण सकारत्मक नहुनु भएको बताउनु भयो ।
उहाँले भन्नुभयो,‘निजी क्षेत्रका तीन वटा संस्थाहरुले सरकारले ल्याउने बजेट र मौद्रिक नीतिमा एउटा भ्वाइसमा सुझावहरु दियौं । त्यो सुझावहरु कार्यान्वयन हुन सकेन । निजी क्षेत्रको समस्याका विषयमा सरकार र नियमनकारी निकायहरुले बेवास्था गर्दा अर्थतन्त्रमा असजिलो आएको छ । तर पछिल्लो समय धेरै आशाको किरणहरु देखिएको छ । रेमिट्यान्स निरन्तर रुपमा वृद्धि भएको छ ।
पर्यटन आगमनमा पनि वृद्धि भएको छ । बैंकहरुमा तरलता बढ्दै गएको छ । देशमा अब केबल सरकार र नियमनकारी निकायहरुको तर्फबाट सर्वसाधरणको मनोबल बढाउने नियमनकारी निकायहरुले सिस्टमलाई नबिगारी उद्योगी व्यवसायीहरु र जनताको आत्मवल बढ्ने नीति अपनाउनुपर्ने खाँचो छ ।’
उहाँले पछिल्लो समय अर्थतन्त्रमा सकारात्मक संकेतहरु देखिएको बताउनु भयो । उहाँले रेमिट्यान्स,पर्यटन आगमन र बैंकिङ तरलतामा सहजता आएको बताउनु भयो । उहाँले अर्थतन्त्रका आयामहरुमा सकारात्मक संकेत देखिएको भन्दै सरकारले सबैको मनोबल उच्च बनाउने गरी नीतिहरु ल्याउन आवश्यक रहेको बताउनु भयो ।
