काठमाडौं । आइसिसी महिला टि-२० विश्वकप एसिया क्षेत्र छनोटमा भुटानले नेपाललाई ४० रनको सामान्य विजयी लक्ष्य दिएको छ ।
मलेसियाको बांगीमा टस हारेर पहिला ब्याटिङ गरेको भुटानले निर्धारित २० ओभरमा ८ विकेट गुमाउँदै ३९ रन बनायो । भुटानकी कप्तान डेचेन वांग्मोले सर्वाधिक २१ रन बनाइन् ।
कप्तान डेचेनबाहेक भुटानका अन्य खेलाडिले राम्रो खेल्न सकेनन् । ओपनर न्गवागं चोडेन शून्य रनमै तीव्र गतिकी बलर कविता कुँवरको हातबाट बोल्ड आउट भएकी थिईन् भने अर्की ओपनर कर्मा डेमा २७ बलमा १ रन बनाउँदै आउट भइन् ।
नेपालकी तीव्र गतिकी बलर पुजा महतोले सर्वाधिक तीन विकेट लिइन् । कप्तान रुविना क्षेत्री बेलबासे, खुशी डंगोल, कविता कुँवरले समान एक विकेट लिए ।
नेपालले पहिलो खेलमा मलेसियालाई ५ रन र दोस्रो खेलमा बहराइनलाई १० विकेटले हराएको थियो । भुटान पहिलो खेलमा युएईसँग ९ विकेटले पराजित भएको थियो भने दोस्रो खेलमा बहराइनलाई ८ विकेटले हराएको थियो ।
