काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले सदन खुलाउन सबै दलका नेताहरु जिम्मेवार हुनुपर्ने बताएका छन् ।
सिंहदरबारमा प्रधानमन्त्रीले राख्नुभएको बैठकपछि सञ्चारकर्मीहरुसँग बोल्दै उनले यस्तो बताएका हुन् ।
के कुरा भन्नुपर्छ सदनमा भनौं भन्दै उनले भने, ‘हाम्रो लाइन समिति बन्न सक्छ भने बनाउँदा पनि फरक परेन । नबन्दा पनि सीआईबीले काम गरेको सही छ छैन भनेर हामीले प्रश्न गर्न पाउनुपर्छ । संसदमा प्रश्न गर्न पाउनुपर्यो । संसद खुल्यो भने हामीले गृहमन्त्रीलाई प्रश्न गर्न पाउँछौं ।’
सभापति लामिछानेले सदन खुलेमा मात्र अनुसन्धानमा भइरहेको कमीकमजोरीबारे थाहा पाउन सकिन्छ भन्दै संसद खोल्न जोड दिए । उनले थपे,’संसद चाहिँ अवरोध हुन भएन भन्ने हाम्रो लाइन हो । जे छलफल गर्नुपर्छ संसदमा गर्नुपर्यो । के कुरा भन्नुपर्छ, सदनमा भनौं भन्ने हाम्रो लाइन हो ।’
आज प्रधानमन्त्रीले राखेको बैठकमा कुनै सहमति नभएपछि भोलि फेरि बस्ने सहमति भएको छ । दलहरुबीच कुरा नमिलेपछि आज बोलाइएको प्रतिनिधिसभाको बैठक मंगलबारका लागि सारिएको छ ।
सुन प्रकरणमा उच्चस्तरीय छानबिन समितिको अडान राख्दै एमालेले निरन्तर संसद अवरोध गर्दै आईरहेको छ ।
