![](https://newspolar.com/wp-content/uploads/2022/03/Aakthier_CIAA-e1564536516493_nqx4RKcCOE.jpg)
काठमाडौं: अख्तियार दुरुपयोग अनुसन्धान आयोगको टोलीले घुस लिँदालिँदै एक इन्जिनियर र निजका साथीलाई पक्राउ गरेको छ ।
आयोगका प्रवक्ता भोला दाहालका अनुसार, आयोगको कार्यालय बर्दिबासबाट खटिएको टोलीले धनुषाको शहिदनगर नगरपालिकामा कार्यरत इन्जिनियर रमेश कुमार चौधरीले वाल निर्माण कार्य सम्पन्न पश्चात सो कार्यको भुक्तानी दिने क्रममा सेवाग्राहीसँग घुस माग गरेको भन्ने सूचना एवं उजुरीका आधारमा नियन्त्रणमा लिएको थियो ।
इन्जिनियर चौधरी र निजको साथी गुरुदेव यादवलाई सेवाग्राहीबाट रु १,००,०००।– घुस बापतको रकम लिइसकेको अवस्थामा उक्त रकम र रु १ लाख ७५ हजार रुपैयाँको चेकसहित धनुषा, शहिदनगर नगरपालिका वडा नं ३ स्थित पशु सेवा केन्द्रको भवनबाट नियन्त्रणमा लिइएको पनि आयोगले जनाएको छ ।
उनीहरुलाई भ्रष्टाचार निवारण ऐन बमोजिम थप अनुसन्धान र अभियोजन हुने पनि बताइएको छ ।