काठमाडौँ । नेपालमा लगातार दोस्रो वर्ष उमेरसमूहका एशियन रग्बी सेभेन्स प्रतियोगिता हुने भएको छ ।
एशिया रग्बीको आयोजना तथा नेपाल रग्बी संघको व्यवस्थापनमा एशिया यु–२० महिला तथा पुरुष रग्बी सेभेन्स प्रतियोगिता हुने भएसँगै नेपालमा लगातार दोस्रो वर्ष उमेरसमूहका एशियाली प्रतिष्पर्धा हुन लागेको हो ।
गत वर्ष भने नेपालले एशिया यु–१८ महिला तथा पुरुष रग्बी सेभेन्स प्रतियोगिता आयोजना गरेको थियो । पछिल्लो समय विश्व रग्बीको पूर्ण सदस्यता प्राप्त गरेसँगै नेपालले यु–२० को प्रतियोगिता आयोजना गर्न लागेको हो । उक्त प्रतियोगिता आगामी भदौ २ र ३ गते त्रिपुरेश्वरस्थित दशरथ रंगशालामा हुने नेपाल रग्बी संघले जनाएको छ । एशियन यु–२० रग्बी सेभेन्स प्रतियोगितामा भारत, थाइल्याण्ड, मलेसिया, चाइनिज ताइपेइ, हङकङ, उज्वेकिस्तान र नेपाल गरी सात राष्ट्रले प्रतिष्पर्धा गर्नेछन् ।
यद्यपि, पुरुषतर्फ सात राष्ट्रको चुनौती रहँदा महिलामा भने तीन राष्ट्र आयोजक नेपाल, थाइल्याण्ड र मलेसियाको मात्र सहभागिता रहनेछ नेपाल रग्बी संघले जनाएको छ । प्रतियोगिता आयोजनाका लागि करिव ७२ लाख रुपैया खर्च हुने संघको अनुमान छ । प्रतियोगिताका विजेताले ट्रफी प्राप्त गर्नेछ । एशिया रग्बीको सदस्यता प्राप्त गरेका ३५ राष्ट्रका रग्बी संघहरुले यस प्रतियोगिताको प्रत्यक्ष प्रशारण गर्नेछन् । प्रतियोगिताका लागि नेपाली यु–२० महिला तथा पुरुष राष्ट्रिय टोलीको बन्द प्रशिक्षण पोखरामा सञ्चालन भइरहेको छ ।
श्रीलंकन प्रशिक्षक सेन वेजेसिंघेले गत असार १५ गतेबाट दिइरहेको उक्त प्रशिक्षण निकै प्रभावकारी रहेकाले टोलीले राम्रो नतिजा ल्याउने विश्वस्त रहेको नेपाल रग्बी संघले बताएको छ । हाल महिला र पुरुषतर्फ समान २० खेलाडी पोखरामा हाई पर्पmमेन्स प्रशिक्षणमा छन् । उनीहरूमध्ये अन्तिम १५ टोलीले आगामी प्रतियोगितामा प्रतिष्पर्धा गर्नेछ ।
