काठमाडौँ । प्रधानमन्त्री पुष्पकमल दाहाल ‘प्रचण्ड’कि पत्नी सीता दाहालको निधन भएको छ । लामो समयदेखि बिरामी दाहाललाई नर्भिक अस्पतालमा उपचारका लागि ल्याइएको थियो । दाहाललाई अक्सिजनको कमी हुँदा भइ ८ बजे हृदयघात भएको र उपचारका क्रममा आज विहान ८ः३३ बजे उहाँको निधन भएको अस्पताल स्रोतले जनाएको छ । अस्पतालले केही बेरपछि यसको आधिकारिक जानकारी गराउने तयारी गरेको छ ।
सीता दाहाल लामो समयदेखि पार्किन्सन जस्तो देखिने एक जटिल प्रकारको रोगबाट पीडित हुनुहुन्थ्यो । त्यसलाई प्रोग्रेसिभ सुपरान्युक्लियर पाल्सी (पीएसपी) भनिन्छ । जसका कारण मानिसको मानसिक असन्तुलनका साथै हिँड्न, बोल्न र निल्नसमेत कठिन हुने गर्छ ।
उक्त रोगले मस्तिष्कको कोशिकामा क्षति हुँदा यस्तो समस्या देखिनेगर्छ । छोरा प्रकाश दाहालको असामयिक निधनपछि सीतालाई रोगले झन च्यापेको थियो । उहाँलाई यसअघि नेपालका विभिन्न अस्पतालका साथै अमेरिका, सिंगापुर र भारतका विभिन्न अस्पतालमा लगेर उपचार गराइएको थियो ।
सीता दाहाल आफ्नी धर्मपत्नी मात्र नभएर माओवादीको एक नेतृको भूमिकामा भूमिगतकालदेखि नै रहेको र पार्टीलाई माथि उठाउन सीता दाहालको ठूलो भूमिका रहेको प्रचण्डले बताउँदै आउनुभएको छ ।
प्रचण्डले दश वर्षको सशस्त्र युद्धको नेतृत्व गर्नुअघि पत्नी सीताले उहाँलाई राजनीतिमा त्यति धेरै साथ नदिए पनि सशस्त्र युद्धताका भने सिता प्रचण्डसँगै युद्धमा होमिनुभएको थियो । उहाँले प्रचण्डका पाइला–पाइलामा साथ दिनुभएको थियो । पत्नी सिता दाहालको सल्लाहमा प्रचण्डले निकै ठुला निर्णयहरु समेत गरेको मानिन्छ । माओवादी नेतृत्वभित्र चर्किने गरेका ठूला–ठूला अन्तरसंघर्षमा समेत सिताले प्रचण्डलाई सल्लाह दिने गर्नुहुन्थ्यो । यसरी हेर्दा प्रचण्डको राजनीतिक जीवनमा पनि पत्नी सीता दाहालको निकै ठूलो भूमिका देखिन्छ ।
