काठमाडौँ। ऊर्जा, जलस्रोत तथा सिँचाइमन्त्री विराजभक्त श्रेष्ठले भोटेकोशी बाढीले अगामी दिनमा जलवायु अनुकूलनयुक्त संरचना निर्माणमा जोड दिनुपर्ने पाठ सिकाएको बताउनुभएको छ ।
मंगलवार सिंहदरबास्थित मन्त्रालय स्वतन्त्र उर्जा उत्पादकहरुको संस्था (इप्पान)का पदाधिकारीहरुसँगको छलफल तथा सहयोग हस्तान्त्ररण कार्यक्रममा बोल्दै उहाँले यस्तो बताउनुभएको हो । उहाँले जलवायुजन्य विपद्को सामना गर्नसक्ने तथा भौगोलिक बनावटलाई समेत मध्यनजर गरेर पूर्वाधार निर्माण गर्नुपर्ने अबको आवश्यकता रहेको बताउनु भयो ।
उहाँले भोटेकोशी–त्रिशूली करिडोरको भौगोलिक बनावट र प्रतिकूल मौसमी अवस्थाका कारण विपद्को जोखिम उच्च रहेको उल्लेख गर्दै देशका अन्य मुख्य करिडोरमा पनि यस्तै बाढी आए ठूलो क्षति हुनसक्ने समेत बताउनु भयो । मन्त्री श्रेष्ठले अब पूर्वाधार निर्माण गर्दा जलवायु परिवर्तनका सम्भावित प्रभावलाई पूर्वानुमान गरी त्यसअनुसार संरचना निर्माण निर्माण गर्नुपर्ने बताउनुभयो ।
उहाँले विपद्का समयमा स्वतन्त्र ऊर्जा उत्पादकहरूको संस्था, नेपाल (इप्पान)ले सरकारसँग गरेको समन्वय र सहकार्यको प्रशंसा गर्दै नीतिगत सुधार र भविष्यका सम्भावनाको खोजीमा समेत सहकार्य आवश्यक रहेको बताउनु भयो । उहाँले विपद्को समयमा सबै पक्ष एकजुट भएको सन्देश राष्ट्रिय तथा अन्तर्राष्ट्रियस्तरमा दिनुपर्नेमा समेत जोड दिनुभयो ।
उहाँले सरकारले जलविद्युत आयोजनाका सुरुङ तथा टनेलमा फसेका नागरिकको खोज तथा उद्धारलाई प्राथमिकतामा राखेको उल्लेख गर्दै विपद्का बेला राज्यको व्यवहार सबैप्रति समान रहेको दाबी गर्नुभयो ।
उहाँले भन्नुभयो, ‘जलवायु परिवर्तनको असरको कारणले भोटेकोशी–त्रिसूली करिडोरमा जे भयो, हाम्रा अन्य मुख्य करिडोरमा यस्तो भयो भने कस्तो खालको क्षति हुन्थ्यो होला ? त्यहाँ गएर हेर्दाखेरी भौगोलिक बनावट र परिस्थिति नै त्यस्तै छ । प्राकृतिक मौसमको प्रतिकुलताहरु पनि निकै चुनौतीपूर्ण छ । त्यसकारण अब हामी पूर्वाधार निर्माण गर्दा पनि क्लाइमेट रेजिलेन्स स्ट्रक्चरदेखि लिएर सबै कुरामा पुवर्विचार गर्नुपर्ने ठाउँमा आइपुगेका छौँ । म यस विपद्को घडीमा जसरी इप्पानले जस्तो समन्वय र सहकार्य गरेको छ यसको लागि धन्यावाद पनि दिन चाहन्छु । हामीले नीतिगत सुधारदेखि लिएर अलिकति फ्युचरिस्टिक पसिबिलिटिजलाई एक्सप्लोर गर्नेदेखि लिएर यो विपद्मा पनि तपाईहरुले सदासयता देखाउनुभएको छ । हामीबीच वैचारिक भिन्नताहरु पनि हुन्छन् । सबै चिज हुन्छ । तर यो अवस्थामा हामी सबै सँगै छौँ भन्ने सन्देश राष्ट्रियस्तरमा मात्र नभई अन्तर्राष्ट्रिय जगतलाई दिन्छ जस्तो लाग्छ । अहिले सरकारले जलविद्युत आयोजनाका सुरुङ र टनेलमा फस्नुभएका नागरिकको खोज र उद्धारमा निजी भनेको छ । यो पटक राज्यको प्राथमिकता र व्यवहार समेत समान छ । त्यसकारण तपाईलाई आवश्वस्त पार्न सफल पनि भएका छौँ कि राज्य तपाईंको साथमा रहेको छ भनेर यो विपद् हुनुमा कसैको पनि हात छैन । तर यसको प्रतिकार्य र विपद्पछिको खोज, उद्धार र राहत वितरणमा कस्तो खालको समन्वय र सहकार्य गरेर काम गर्छौँ भन्ने कुरा निकै महत्वपूर्ण हुँदो रहेछ ।’
उहाँले विपद्को समयमा सरकार नागरिकसँगै छ भन्ने विश्वास दिलाउन सफल भएको दाबी पनि गर्नुभयो । –न्युज एजेन्सी नेपाल
