काठमाडौँ । राष्ट्रिय सभा सदस्य रामचन्द्र राईले आर्थिक वर्ष २०८०/८१ को बजेट ‘जसले हान्यो त्यसले जान्यो’ भन्ने भनाइलाई सार्थक बनाउनेगरी आएको बताउनुभएको छ ।
मंगलवार राष्ट्रिय सभा बैठकमा बोल्दै राष्ट्रिय सभा सदस्य राईले आ.व. २०८०/८१ को बजेट मनमौजी तरिकाले आएको बताउनु भयो । उहाँले डडेल्धुरा, गोरखा र नुवाकोट जिल्लामा मात्रै बजेटको ४५ प्रतिशत रकम विनियोजन गरिएको बताउनु भयो । त्यस्तै बजेटले समन्यायिक विकासलाई आत्मसात गर्न नसकेको बताउनु भयो ।
राईले आदिवासी, जतजातिको क्षेत्रमा पनि बजेटले कुनै चासो नदेखाएको बताउनु भयो । उहाँले भन्नुभयो – ‘बजेट विनियोजन मनमौजी छ । हाम्रो समाजमा एउटा मिथक छ, जसले हान्यो त्यसले जान्यो भन्ने । त्यो मिथकलाई सार्थक बनाउनेगरी यो बजेट आएको छ । डडेल्धुरा, नुवाकोट र गोरखामा ४५ प्रतिशत रकम विनियोजन भएको छ । बजेटले समन्यायिक विकासलाई आत्मसात गरेको छैन । त्यस्तै आदिवासी जनजातिहरुको सन्दर्भमा, क्षेत्रमा, यसले कुनै चासो देखाएको देखिँदैन । मुलुकमा रहेका ३५.८१ प्रतिशत जनतालाई बेवास्ता गर्छ भने यो बजेट कसरी समन्यायिक हुनसक्छ ? यो विनियोजन कसरी समन्यायिक हुनसक्छ ? त्यसैले यो बजेट साच्चै ठट्टा गर्न आएको छ ।’
उहाँले बजेटमार्फत नेपालमा भएका भौतिक र अभौतिक सम्पदाहरुलाई संरक्षण तथा संवद्र्धन गर्ने कुरामा पनि चासो नदेखाएको बताउनु भयो ।
