काठमाडौँ । सभामुख देवराज घिमिरेले संसदीय समितिका सभापति चयनका विषयमा प्रधानमन्त्रीसहित प्रमुख तीन दलका शीर्ष नेताहरुसँग मंगलबार बिहान छलफल सुरु गर्नुभएको छ ।
सभामुख घिमिरेले मंगलबार सिंहदरबारस्थित कार्यकक्षमा प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल प्रचण्ड, प्रमुख विपक्षी दलका नेता एवं नेकपा (एमाले) अध्यक्ष केपी शर्मा ओली र नेपाली कांग्रेसका सभापति शेरबहादुर देउवासँग छलफल हुँदैछ । छलफलमा कानूनमन्त्री धनराज गुरुङ पनि सहभागी हुनुहुन्छ ।
उहाँले संसदीय समितिका सभापति चयन र संसदलाई प्रभावकारी बनाउने विषयमा शीर्ष नेताहरुसँग छलफल गर्नुहुने सभामुखको सचिवालयले जनाएको छ ।
प्रतिनिधिसभा अन्तर्गत १० वटा विषयगत समिति भए पनि कुनै पनि संसदीय समितिका सभापति चयन भएका छैनन् । राष्ट्रियसभा र प्रतिनिधि सभाका संयुक्त दुई समिति पनि सभापति विहीन छन् । अहिलेसम्म समितिको बैठक बस्दा बैठकको अध्यक्षता ज्येष्ठ सदस्यले गर्दै आएका छन् ।
गत वैशाख १५ गते प्रतिनिधिसभाका १० वटै विषयगत समिति गठन भएको थियो । त्यसको दुई सातापछि जेठ २ गते एक साथ १० वटै समितिको बैठक सुरु भए पनि सभापति चयन हुन सकेको थिएन । सभापति चयन हुन नसक्दा समितिहरुले विधेयकमाथि छलफल गर्न सकेका छैनन् ।
