काठमाडौं । सञ्चार तथा सूचना प्रविधिमन्त्री रेखा शर्माले सरकारी सेवामा भएका आईटी जनशक्तिको विकासका लागि स्टाफ कलेजको व्यवस्था गर्ने बताउनुभएको छ ।
‘डिजिटल नेपाल कन्क्लेभ २०२३’ को उदघाटन समारोहमा उहाँले भन्नुभयो, “हामी सरकारी सेवामा भएका आईटी जनशक्तिको विकासका लागि छुट्टै स्टाफ कलेजको व्यवस्था गर्छौं ।”
सबै नागरिकसामू सूचना प्रविधिको पहुँच पर्याउन आवश्यक नीति बनाउने काम भइरहेको जानकारी दिँदै उहाँले सूचना प्रविधि क्षेत्र पुरानै नीतिले चलिरहेकाले पुराना नीतिलाई समयानुकूल बनाउने गरी मन्त्रालयले काम गरिरहेको बताइन्।
उहाँका अनुसार मन्त्रालय मात्र नभएर सरकारले मन्त्रिपरिषद्मा पनि छलफल गरिरहेको छ । “अबको १० वर्षमा सूचना प्रविधिमा उल्लेखनीय विकास हुनेछ”, मन्त्री शर्माले भन्नुभयो ।
सरकारसँग समन्वय गर्न सक्ने संस्था नहुँदा डिजिटल नेपाल फ्रेमवर्कलाई पूर्ण कार्यान्वयन गर्न कठिन उल्लेख गर्दै उहाँले भन्नुभयो, “डिजिटल नेपाल फ्रेमवर्क कार्यान्वयनका लागि अधिकारप्राप्त संस्थाको खाँचो छ । यसका लागि मन्त्रालयमा छलफल भइरहेको छ।”
सूचना प्रविधिबाट हुन सक्ने दुरूपयोग रोक्न मन्त्रालय सचेत रहेको र सरकारले डिजिटल साक्षरतामा काम गर्न खोजिरहेको उहाँको भनाइ थियो ।
