तनहुँ । तनहुँको भिमादस्थित मिछुर्लुङमा रहेको मगर लाफा भिलेज पर्यटकहरूको आकर्षणको केन्द्र बन्दै आएको छ ।
प्रकृति, संस्कृति र मगर संस्कारलाई प्रवद्र्धन गर्दै आएको यो रिसोर्टमा प्रकृतिको सुन्दर दृश्यावलोकन, मगरको संस्कार, सँस्कृति बुझ्न सकिन्छ ।
पत्रकार प्रताप रानाको व्यक्तिगत लगानीमा सो रिसोर्ट सञ्चालनमा आएको हो । रिसोर्टको मुख्य आकर्षण घुमाउने घर र खुर्पेटो रहेको छ । लोप हुन लागिसकेको अवस्थाको खुर्पेटो र घुमाउने घर रिसोर्टमा राखिएको छ ।
मगर समुदायको चिनारीको रुपमा रहेको खुर्पेटो रिसोर्टको अगाडि नै देख्न सकिन्छ । साथै रिसोर्टमा रहेको घुमाउने घरमा पूरानै किसिमको खरको छानो राखिएको छ ।
रिसोर्टमा ढिकी, जाँतो जस्ता पूराना सामाग्रीहरू पनि राखिएको छ ।
लाफा भेलेज रहेको मिर्छुलुङको डाडाँमा एक भ्यु टावर समेत रहेको छ । उक्त भ्यु टावरले आन्तरिक पर्यटकलाई थप आकर्षित गर्दै आएको छ । सो भ्यु टावर स्थानीयको सक्रियतामा निर्माण गरिएको हो ।
तनहुँको खैरेनीटारबाट ८ किलोमिटरमा भिमाद रहेको छ । भिमाद हुँदै मिर्छुलुङ पुग्न सकिन्छ । भिमादबाट ४ किलोमिटर माथि मिर्छुलुङमा जानका लागि यातायातको सुविधा पनि रहेको छ ।
