काठमाडौँ । नेकपा (माओवादी केन्द्र) का उपमहासचिव जनार्दन शर्माले नेपालको राजनीतिक इतिहास माओवादीविना अपूरो हुने बताउनुभएको छ ।
प्रतिनिधिसभाको शुक्रबारको बैठकमा बजेटमाथि भएको छलफलमा उहाँले संघीयता, धर्म निरपेक्षता, समावेशीता जस्ता मुद्दा माओवादीको विरासत भएको र संसद्को तेस्रो शक्ति बने पनि परिवर्तनको रापतापबाट आएको चुम्बकीय शक्ति बाँकी रहेको बताउनुभयो ।
बजेटमाथिको छलफलका क्रममा नेकपा (एमाले) का अध्यक्ष केपी शर्मा ओलीले माओवादी ३२ सिट झरेको व्यंग्यको जवाफमा उहाँले माओवादीको शक्तिविना एमाले अध्यक्ष ओलीको सिंहदरबार यात्रा कठिन रहेको बताउनुभयो ।
उहाँले भन्नुभयो, “माओवादीको बलमा माननीय केपी ओलीजीलाई प्रधानमन्त्री बनाउन हामीले पार्टीगत, समूहगत र व्यक्तिगत रुपमा योगदान पुर्याएको होइनौँ र ?”
मंसिरको चुनावमा एमालेको एकल एजेण्डा अनुमोदन नभएको र शक्तिको व्यापक क्षयीकरण भएको उहाँको भनाइ थियो । उपमहासचिव शर्माले भन्नुभयो, “याद रहोस्, माओवादीको शक्तिविना तपाईंको सिंहदरबार यात्रा कठिन छ र भइरहने छ ।”
