एजेन्सी । फ्रान्सेली फरवार्ड करिम बेन्जेमा साउदी अरबको प्रो लिग क्लब अल इतिहादमा अनुबन्धित भएका छन् ।
३५ वर्षीय बेन्जेमाले स्पेनिस क्लब रियल मड्रिडबाट बाहिरिएलगत्तै इतिहादमा भित्रिएका हुन् । उनले क्लबसँग तीन वर्षको सम्झौता गरेका छन् । उनले १४ वर्षपछि रियल छाडेका थिए ।
बालोन डीओर विजेता बेन्जेमा सन् २००९ मा लियोनबाट रियल आएका थिए । बेन्जेमाले रियलबाट पाँच च्याम्पियन्स लिग र चार ला लिगा उपाधि जितेका छन् ।
उनले रियलका लागि ३ सय ५४ गोल गरेका छन् । उनी क्रिस्टियानो रोनाल्डोपछि रियलको दोस्रो सर्वाधिक गोलकर्ता पनि हुन् ।
रोनाल्डो अर्को साउदी क्लब अल–नासरबाट खेल्छन् । रियलका पूर्वखेलाडीद्वय अब भने एक–अर्काका प्रतीद्वन्द्वी हुने भएका छन् ।
यसैबीच, अर्जेन्टिनी खेलाडी लियोनल मेसी पनि साउदी क्लबमा अनुबन्ध हुन सक्ने चर्चा छ । उनको पेरिस सेन्ट जर्मेन (पिएसजी)सँगको सम्झौता सकिसकेको छ भने गत शनिबार क्लबका लागि अन्तिम खेल खेलेका थिए ।
