बिर्तामोड । भुटानी शरणार्थीहरुले प्रधानमन्त्री पुष्पकमल दाहाल प्रचण्डको यही जेठ १७ गतेदेखि सुरु हुन लागेको भारत भ्रमणका क्रममा स्वदेश फिर्ताको मुद्दालाई समेत समावेश गरिदिन माग गरेका छन् ।
स्वदेश फिर्तीको माग गर्दै आएको भुटान स्वतन्त्र जनमञ्चले एक विज्ञप्ति जारी गर्दै भुटानी शरणार्थीको स्वदेश फिर्तीको विषयमा समेत प्रधानमन्त्री प्रचण्डलाई भारत सरकारका प्रतिनिधिसँग छलफल गर्न आग्रह गरेको हो ।
मञ्चका महासचिव धनवीर (डिबी) सुब्बाले भारतसँग छलफल गरी भुटानी शरणार्थी स्वदेश फिर्तीका लागि नेपाल र भुटान सरकारबीच वार्ता–छलफलको वातावरण बनाउन आग्रह गरेको बताउनुभयो ।
भुटानी शरणार्थीहरु ३० वर्षदेखि पूर्वी नेपालको झापा र मोरङका शिविरमा शरणार्थीका रुपमा बसिरहेका छन् । एक लाख १३ हजार ५ सय शरणार्थी अमेरिका, अष्ट्रेलियालगायत ८ वटा पश्चिमा देशमा पुनर्वास कार्यक्रमअन्तर्गत गएका छन् । सुब्बाका अनुसार झापाको दमकस्थित बेलडाँगी र मोरङको पथरी शनिश्चरे शिविरमा गरी नेपालमा ६ हजार ५ सय भुटानी शरणार्थी बसिरहेका छन् ।
मञ्चले भुटानी शरणार्थीको नाममा विभिन्न आपराधिक गतिविधिहरु भएकोप्रति ध्यानाकर्षण भएको भन्दै आपराधिक गतिविधिको नाममा भुटानी शरणार्थीको स्वदेश फिर्तीको अधिकार र चाहनामाथि कुनै आँच पुग्न नहुनेमा जोड दिएको छ । मञ्चले शिविरमा हाल रहेकामध्येबाट आत्मसम्मानपूर्वक स्वदेश फर्कन चाहनेहरुको तर्फबाट नेपाल सरकार, प्रधानमन्त्री, गृह मन्त्रालय, परराष्ट्र मन्त्रालय र सम्बन्धित निकायको ध्यानाकर्षण गराएको विज्ञप्तिमा उल्लेख छ ।
भुटानी शरणार्थीको समस्याको दीर्घकालीन समाधानका लागि ‘सम्मानजनक स्वदेश फिर्ती’ को विकल्प अगाडि बढाउनका लागि आवश्यक वार्ता, छलफल, नीति निर्णय र निर्देशनजस्ता ठोस पहल गरिदिन समेत मञ्चले आग्रह गरेको छ ।
