काठमाडौं । नेकपा एमालेका नेता प्रभु शाहले देश र जनताको दिगो हितलाई केन्द्र विन्दुमा राखी वर्तमान संविधानको पुर्नःलेखनको जरूरी रहेको बताएका छन् ।
पूर्वमन्त्रीसमेत रहेका नेता शाहले सामाजिक सञ्जालमार्फत धारणा व्यक्त गर्दै संवैधानिक प्रावधानहरु बारेको फरक बुझाईले गर्दा देश मुडभेड एवं अस्वस्थ प्रतिस्पर्धाको गोलचक्करमा फंस्दै गएको टीप्पणी गरेका हुन् । यस्तै उनले वर्तमान व्यवस्था संकटमा परेको हउवा पिट्नु भनेको अझ देशलाई संकटको लामो सुरुङ्गमा धकेल्नु रहेको पनि टीप्पणी गरेका छन् ।
उनले लेखेका छन्,
संवैधानिक प्रावधानहरु बारेको फरक बुझाईले गर्दा देश मुडभेड एवं अस्वस्थ प्रतिस्पर्धाको गोलचक्करमा फंस्दै गएको सन्दर्भमा गलत प्रवधानहरुलाई सुधार गर्न गम्भीर समिक्षा गर्नुको सट्टा अदृश्य शक्तिहरुको चलखेलमा वर्तमान व्यवस्था संकटमा परेको हउवा पिट्नु भनेको अझ देशलाई संकटको लामो सुरुङ्गमा थकेल्नु हो ।
संविधान निर्माणको तक्माधारीहरुले विगतमा गरेका आफ़नो गल्तीप्रति आत्मिलोचित हुदैं देशमा बेथिती, आरजकता, अस्थीरता, अस्तव्यस्तता एवं फोहरी संसदीय खेलको राईता फैलाउने मुहानको रुपमा रहेको वर्तमान व्यवस्थामा समय सापेक्ष आवश्यक संसोधनरपरिमार्जन गर्नुको सट्टा कुनैपनि वहानामा अहिलेको यस व्यवस्थासंग सति जान खोज्नु वा यसबाट कुनै अद्भुत नतीजाको अपेक्षा राख्नु भनेको 'बबुर रोपेर आँपको अपेक्षा गर्नु' बराबरको मुर्खता हो । तसर्थ, देश र जनताको दिगो हितलाई केन्द्र विन्दुमा राखी वर्तमान संविधानको पुर्नःलेखनको जरूरी छ । यसमा सम्बन्धित सबै पक्षको समयमैं ध्यान पुगोस् ।
