काठमाडौँ । नक्कली भूटानी शरणार्थी प्रकरणमा नेपाली कांग्रेसका दुई सांसदलाई साढे आठ करोड बुझाएको भन्ने अडियो राख्ने नेशनलडेलीडटकम अनलाइनलाई नेपाल प्रेस काउन्सिलले कारबाही गरेको छ।
उक्त अनलाइनलाई काउन्सिलले नेपालभित्र नदेखिने गरी प्रतिबन्ध लगाउने कारबाही गरेको हो।
उजुरीको अनुगमन गर्दा एकपक्षीय पत्रकार आचारसंहिता प्रतिकूल भएको र नियमानुसार दर्ता र सूचीकृत भएको नदेखिएको भन्दै काउन्सिलले अर्को निर्णय नभएसम्मका लागि नेपालभित्र सम्प्रेषण हुन नसक्ने बनाउन नेपाल दूरसञ्चार प्राधिकरणलाई पत्र पठाएको छ।
आइतबार कांग्रेस सांसद आरजु राणा देउवा र खाणलाई साढे दुई करोड र ६ करोड रुपैयाँ बुझाएको दाबीसहितको संवादको अडियो उक्त अनलाइनबाट सार्वजनिक भएको थियो।
अडियोबारे कांग्रेस सांसद राणाले संसदमा बोल्दै आफू संलग्न नभएको दाबी गर्दै सबै सांसदको सम्पत्ति सार्वजनिक गर्न माग गर्नुभएको थियो । खाणबाट भने सार्वजनिक रूपमा प्रतिक्रिया आएको छैन।
