काठमाडौँ । नक्कली भुटानी शरणार्थी प्रकरणले मुलुकको राजनीतिक वृत्त गर्माएको छ । यो प्रकरणमा प्रमुख दलका नेताहरु पनि अनुसन्धानमा तानिन थालेपछि राजनीतिक वृत्त गर्माएको हो । यसैकारण दलका शीर्ष नेताहरुको दौडधुप पनि बाक्लिएको हो ।
प्रमुख प्रतिपक्षी दल एमालेका सचिव एवं पूर्वउपप्रधानमन्त्री टोपबहादुर रायमाझी, उनका छोरा सन्दीप, एमाले उपाध्यक्ष एवं पूर्वगृहमन्त्री रामबहादुर थापा छोरा प्रतीक प्रहरी अनुसन्धानमा तानिएका छन् । उनीहरुमध्ये सन्दीप पक्राउ परेका छन् । पूर्वउपप्रधानमन्त्री रायमाझी र प्रतीक थापा भने फरार छन् ।
पूर्वउपप्रधानमन्त्री रायमाझीविरुद्ध प्रहरीले गत बुधबार जिल्ला अदालत काठमाडौँबाट पक्राउ पुर्जी लिएपछि एमाले अध्यक्ष केपी ओलीले बिहीबार प्रधानमन्त्री पुष्पकमल दाहाललाई भेटेका थिए । भेटपछि पत्रकारसँग कुरा गर्दै ओलीले आफूले प्रधानमन्त्री दाहालको ध्यानाकर्षण गराएको प्रतिक्रिया दिएका थिए । उनले पूर्वउपप्रधानमन्त्री भइसकेको व्यक्ति ९रायमाझी० भागेर कहीँ नजाने भएकाले बाटोमा हिँड्दाहिँड्दै पक्राउ गर्न खोजिएको भन्दै असन्तुष्टि जनाएका थिए । तर रायमाझी चार दिनदेखि फरार छन् ।
पार्टी सचिव रायमाझीविरुद्ध पक्राउ पुर्जी जारी भएपछि रक्षात्मक बनेको एमालेले पार्टीका अन्य नेता पनि तानिन सक्ने देखेपछि सत्तारुढ दलतर्फ औँला तेस्र्याउन थालेको छ । प्रहरी अनुसन्धान अघि बढ्दै जाँदा तत्कालीन गृहमन्त्री रहेका पार्टी उपाध्यक्ष थापाका छोरा प्रतीकविरुद्ध पक्राउ पुर्जी जारी भइसकेको छ । थापा गृहम्नत्री हुँदा सल्लाहकार रहेका इन्द्रजित राई प्रहरी हिरासतमा छन् ।
ओली सरकारमा पालामा २०७६ असार २९ गते गृह मन्त्रालयका पूर्वसहसचिव बालकृष्ण पन्थीको संयोजकत्वमा घुटानी शरणार्थी समस्याको स्थायी र दीर्घकालीन समाधानका उपायहरु पहिल्याउन कार्यदल गठन भएको थियो । जसको संयोजना तत्कालीन गृहमन्त्री थापाका सुरक्षा सल्लाहकार राईले गरेका थिए । यस्तै गिरोहकै सदस्यको सिफारिसमा कार्यदलका सदस्यहरु नियुक्त गरिएको कुरा पनि खुलेको छ । यसकारण तत्कालीन गृहमन्त्री थापा पनि तानिन सक्ने खतरा छ । गृह प्रशासनमा निजामति सेवाका तर्फका एमाले निकट कर्मचारी पनि तानिन सक्ने सम्भावना छ ।
यसैक्रममा एमाले अध्यक्ष ओलीले शनिबार पनि प्रधानमन्त्री दाहाललाई भेटेर ठगी गिरोहमा संलग्न भएको भन्दै चारजनाको नाम दिएको स्रोतको दाबी छ । कांग्रेस नेता एवं पूर्वगृहमन्त्री बालकृष्ण खाण, उनकी पत्नी एवं प्रतिनिधिसभा सदस्य मन्जु खाण, कांग्रेस सांसद रामहरि खतिवडा र पूर्वउपराष्ट्रपति नन्दकिशोर पुनका छोरा दिपेशलाई पनि अनुसन्धानको दायरामा ल्याउन ओलीले प्रधानमन्त्री दाहाललाई दबाब दिएको स्रोतको दाबी छ ।
ओलीले यी चारैजनाको नाम र प्रमाण सरकारी वकिल र प्रहरीमार्फत् आफूकहाँ आएको दाबी गरेको स्रोतको भनाइ छ । जसका लागि गृहमन्त्री नारायणकाजी श्रेष्ठलाई आफूकहाँ भेट्न पठाइदिन ओलीले गरेको आग्रहमा प्रधानमन्त्री दाहाल सहमत भएको बुझिएको छ । आजको नागरिक दैनिकमा समाचार छ
