तातोपानी । सिन्धुपाल्चोकमा रहेको व्यापारिक तातोपानी नाका सोमबारदेखि दुईतर्फी रुपमा सञ्चालनमा आएको छ । पूर्णरुपमा सञ्चालनमा ल्याउने तयारी स्वरुप आजदेखि दुइतर्फी आयात निर्यात सुरु भएको हो ।
सोमबार बिहान नेपालबाट २९ लाख २९ हजार ८ सय ११ रुपैयाँ बराबरको तीन ट्रक मुडा र म्याट्रेस चीनतर्फ निर्यात भएको तातोपानी भन्सार कार्यालयले जनाएको छ ।
गत महिना नेपाली र चिनियाँ अधिकारीहरुबीच ल्हासामा भएको बैठकपछि नाका भूकम्पअघिकै अवस्थामा सञ्चालन गर्ने सहमति भएबमोजिम नेपाल र चीन दुवैतर्फबाट आयात निर्यात खुल्ला भएको हो ।
यसअघि चीनबाट सामग्री ल्याउन एकतर्फी रुपमा तातोपानी नाका सञ्चालनमा थियो । अहिले भने नेपालबाट पनि चीनतर्फ निर्यात गर्न सकिने गरी नाका खुला गरिएको हो ।
नेपाल–चीन सीमा व्यापार तथा सहयोग समन्वय संयन्त्रको पहिलो बैठकको सहमतिअनुसार अनुसार तातोपानी नाकाबाट भूकम्पअघिकै अवस्थामा दुईतर्फी व्यापार र नागरिकको आवतजावत सूचारु हुने भनिए पनि दुवैतर्फ अध्यागमन कार्यालय व्यवस्थित हुन समय लाग्ने भएको छ ।
सोमबार मजदुर दिवस परेको र चीनमा दिवसका अवसरमा पाँच दिन बिदा परेकाले र नेपालतर्फको अध्यागमन कार्यालयमा कर्मचारी व्यवस्थापनमा समय लागेकोले मानव आवतजावतका लागि अझ केही समय लाग्ने बताइएको छ ।
