काठमाडौँ । एसीसी प्रिमियर कप क्रिकेटअन्तर्गत आज नेपाल र साउदी अरबबीचको खेल वर्षाका कारण टससमेत हुन सकेको छैन ।
मूलपानी क्रिकेट मैदानमा समूह ‘ए’ मा रहेका नेपाल र साउदीबीचको खेल बिहान ९ बजेदेखि सुरु हुनुपर्ने थियो तर वर्षा बाधक बनेपछि खेल सुरुआत हुन सकेको छैन ।
दिउँसो २: १५ सम्म खेल सुरु हुन नसकेमा आजको खेल स्थगित हुँदै दुबै टोलीले समान एक एक अंक बाँड्नेछन् ।
साउदीसँग एक अंक बाँड्दा नेपालको ३ खेलमा ५ अंक हुनेछ । यहि समिकरण अनुरुप अन्तिम खेलमा नेपाल कतारसँग पराजित भए पनि सेमिफाइनलमा पुग्नेछ ।
आजको खेलमा साउदी र नेपालले अंक बाँड्दा समूह ‘ए’ मा रहेका कतार र मलेसिया बाहिरिनेछन् । आज नेपालले अंक बाँड्दा साउदीको ३ अंक हुनेछ । बुधबार ओमान र साउदी अरेवियाबीचको खेलबाट विजेता टोली सेमिफाइनलमा पुग्नेछ । अन्तिम खेलमा ओमानलाई हराउँदा साउदीको ५ अंक हुन्छ ।
यस्तै, ओमानकोे ३ खेलमा २ मा जित र १ मा हारसहित ४ अंक छ । अन्तिम खेलमा ओमानले साउदीलाई हराउँदा ६ अंक हुनेछ भने अंक बाँड्दा ५ अंक हुनेछ ।
कतारले अब नेपाल र मलेसियासँग खेल्न बाँकी छ । अंकबिहिन कतारले दुबै खेल जितेमा पनि ४ अंक मात्रै हुन्छ । दुई खेलमा हार र एक खेल जितेको मलेसियाले पनि अन्तिम खेलमा कतारलाई हराउँदा ४ अंक मात्रै हुन्छ ।
समूह ‘ए’ मा रहेको नेपालले दुबै खेल जितेर ४ अंकका साथ शीर्ष स्थानमा छ । ओमान ३ खेलमा २ मा जित र १ मा हारसहित ४ अंकका साथ दोस्रो स्थानमा छ । मलेसिया ३ खेलमा १ मा जित र २ मा हारसहित तेस्रो स्थानमा छ । साउदी २ खेलमा १ मा जित र १ मा हारसहित चौथो स्थानमा छ । कतार २ खेलमा जित विहीन हुँदै पुछारमा छ ।
समूह ‘बी’ मा रहेको युएई ३ खेलमा २ मा जित र १ मा हारसहित ४ अंकका साथ शीर्ष स्थानमा छ । २ खेलमा दुबै जितको हङकङ ४ अंकका साथ दोस्रो स्थानमा छ । बहराइन २ खेलमा १ मा जित र १ मा हारसहित तेस्रो स्थानमा छ ।
कुवेत २ खेलमा १ मा जित र १ मा हारसहित चौथो स्थानमा छ भने सिंगापुर तीनै खेलमा पराजित हुँदै बाहिरिएको छ ।
उता’ टियु मैदानमा आज हुनुपर्ने हङकङ र बहराइनबीचको खेल पनि वर्षाको कारणले रोकिएको छ।
यस प्रतियोगिताको विजेताले आगमी सेप्टेम्बरमा पाकिस्तानमा हुने एसिया कप खेल्न पाउनेछ भने शीर्ष तीन टोलीले एसिसी इमर्जिङ टिम्स एसिया कप खेल्न पाउनेछन् ।
