एजेन्सी । इन्डियन प्रिमियर लिग (आईपीएल) अन्तर्गत रोयल च्यालेन्जर्स बैंगलोरले राजस्थान रोयल्समाथि रोमाञ्चक जित निकालेको छ ।
भर्खरै सम्पन्न खेलमा बैंगलोरले राजस्थानलाई ७ रनले पराजित गरेको हो । १९० रनको विजयी लक्ष्य पछ्याएको राजस्थानले २० ओभरमा ६ विकेटको क्षतिमा १८२ रनमात्र जोड्यो ।
राजस्थानका लागि देवदुत पडिक्कलले ३४ बलमा ५२, यजश्वी जैसवालले ३७ बलमा ४७, ध्रुव जुरेलले १६ बलमा ३४, सञ्जु सामसनले १५ बलमा २२, रविचन्द्र अश्विनले ६ बलमा १२ रन जोडे । जोस बटलर शून्य रनमा आउट हुँदा शिमरोन हेटमायरले ९ बलमा ३ रनमात्र जोडे ।
बलिङतर्फ बैंगलोरमा हर्षल पटेलले तीन तथा डेभिड वीली र मोहम्मद सिराजले एक–एक विकेट लिए ।
त्यसअघि टस हारेर ब्याटिङ थालेको बैंगलोरले २० ओभरमा ९ विकेटको क्षतिमा १८९ रन जोडेको थियो । ग्लेन म्याक्सवेलले सर्वाधिक ७७ रनको योगदान दिए । ४४ बल खेलेका उनले ६ चौका र ४ छक्का प्रहार गरे । यस्तै, कप्तान फाफ डु प्लेसिसले ३९ बलमा ६२ रन जोडे । विराट कोहली शून्य रनमै आउट भए । दिनेश कार्तिकले १३ बलमा १६ रन जोडे ।
बलिङतर्फ राजस्थानका ट्रेन्ट बोल्ट र सन्दीप शर्माले दुई–दुई विकेट लिँदा रविचन्द्र अश्विन र युजवेन्द्र चहलले एक–एक विकेट लिए ।
