एजेन्सी । इन्डियन प्रिमियर लिग (आईपीएल) अन्तर्गत गुजरात टाइटन्सले रोमाञ्चक जित निकालेको छ ।
भर्खरै सम्पन्न खेलमा गुजरातले लखनउ सुपरजायन्ट्सलाई सात रनले पराजित गरेको हो । १३६ रनको विजयी लक्ष्य पछ्याएको लखनउले २० ओभरमा ७ विकेटको क्षतिमा १२८ रनमात्र बनायो ।
दुवै टोलीका लागि कप्तानले ब्याटिङ र अर्धशतक बनाएका थिए तर अन्त्यमा गुजरातको बलिङ लखनउमाथि हावी भयो ।
लखनउलाई अन्तिम ओभरमा १२ रन चाहिएको थियो । टोलीका कप्तान केएल राहुल स्ट्राइकमा र आयुष बडोनी नन स्ट्राइकमा ब्याटिङ गरिरहेका थिए । ३४ वर्षीय तेज बलर मोहित शर्मा बलिङमा आएर खेल नै बदलिदिए ।
केएल राहुलको कप्तानीमा रहेको लखनउको टोलीले १३६ रनको लक्ष्य पछ्याउन सकेन भने टोलीले दुई अर्धशतकीय साझेदारी गरेको थियो ।
टोलीको हारको कारण ब्याट्सम्यानको सुस्त पारी थियो । कप्तान केएल राहुलले ६१ बलमा ६८ रन बनाए । क्रुणाल पाण्ड्या २३ बलमा २३ रन बनाएर फर्किए । काइल मेयर्सले १९ बलमा २४ रन जोडे ।
यसअघि गुजरातका लागि कप्तान हार्दिक पाण्ड्याले ५० बलमा ६६ र ऋद्धिमान शाहले ३७ बलमा ४७ रन बनाएका थिए ।
लखनउका लागि क्रुणाल पाण्ड्या र मार्कस स्टोइनिसले २–२ विकेट लिए । यस्तै नवीन उल हक र अमित मिश्राले एक–एक विकेट लिए ।
गुजरातका लागि मोहित शर्मा र नूर अहमदले २–२ विकेट लिए । राशिद खानले एक विकेट लिए । यो जितसँगै गुजरातको टोलीले ८ अंक जोडेको छ ।
अंक तालिकाको शीर्ष स्थानमा रहेको राजस्थानको पनि आठ अंक भए पनि राम्रो नेट रन रेटका आधारमा यो टोली शीर्ष स्थानमा छ ।
