एजेन्सी । १६ औं संस्करणको इन्डियन प्रिमियर लिग (आईपीएल) २०२३ मा आज शुक्रबार चेन्नई सुपर किंग्स र सनराइजर्स हैदरावादबीच प्रतिस्पर्धा हुँदैछ । खेल साँझ ७ः४५ बजे चेन्नईको चेपक स्टेडियममा हुनेछ । चेन्नईले अहिलेसम्म ५ खेलमा ३ जित र २ हार बेहोरेको छ । यस्तै, हैदरावादले ५ मध्ये २ खेल जितेको छ ।

अहिलेसम्म खेलेका ५ खेलमा चेन्नईले २ खेलमा हार र ३ खेलमा जित निकालेको छ । चेन्नई राजस्थान र लखनउभन्दा ६ अंकका साथ तल तालिकाको तेस्रो स्थानमा छ । यदि चेन्नईले यो खेल बढी अन्तरले जित्यो भने ८ अंकसहित पहिलो स्थानमा उक्लनेछ । टोलीमा ऋतुराज गायकवाड, डेभोन कोनवे र तुषार देशपाण्डे उच्च लयमा रहेका छन् । चेन्नई घरेलु मैदानमा राजस्थान रोयल्ससँग पराजित भएको थियो । राजस्थानले १५ वर्षपछि चेन्नईलाई उसकै घरमा हराउन सफल भएको हो ।

सनराइजर्स हैदरावादले ५ मध्ये २ खेल जितेको छ । उसले पञ्जाबविरुद्ध पहिलो जित र कोलकाताविरुद्ध दोस्रो जित हात पारेको थियो । यस्तै, राजस्थान, लखनउ र मुम्बईसँग भने टोली पराजित भएको थियो । हैदरावादका ब्याट्सम्यानले चेन्नईका स्पिनरहरूको कडा चुनौतीको सामना गर्नुपर्नेछ । चेन्नईमा रविन्द्र जडेजा, मोइन अली, मिचेल सान्टनर जस्ता उत्कृष्ट स्पिन बलर छन् । चेपकको पिच स्पिनरहरूको पक्षमा चिनिन्छ, तर विगतका खेलहरूमा ब्याट्सम्यानहरूलाई पनि मद्दत गरेको छ ।

हैदरावादको स्पिन बलरहरुमामा गहिराइ छैन । टोलीले वाशिङटन सुन्दरलाई प्लेइङ इलेभेनमा राखेको छ, जसले पाँच खेलमा ११ ओभर बलिङ गरेर पनि विकेट लिन सकेनन् । प्लेइङ इलेभेनमा सन्तुलन नहुँदा स्पिनर मयंक मार्कण्डे, आदिल राशिद र अकिल हुसेनले कम खेल्ने मौका पाएका छन् । तर, यो खेलमा कप्तान एडेन मार्करामले स्पिन पिचलाई ध्यानमा राख्दै तीन स्पिनरलाई मौका दिन सक्छन् ।

आईपीएलमा अहिलेसम्म दुवै टोली १९ पटक आमनेसामने भएका छन् । जसमध्ये चेन्नईले १४ र हैदरावादले ५ जित हात पारेको छ ।

चेपकमा अहिलेसम्म दुई खेल हाई स्कोरिङ भएका छन् । पहिले ब्याटिङ गर्ने टिमले जित हात पारेको छ । यो खेलमा पनि यस्तै हुन सक्छ । पछिल्लो पाँच टी–२० खेलमा पहिलो इनिङ्सको औसत स्कोर १६० रनभन्दा बढी रहेको छ । टस जित्ने टोलीले पहिले ब्याटिङ गर्न चाहन्छ ।

यहाँ मौसम सफा रहनेछ । तापमान लगभग ३० डिग्री हुनेछ । पानी पर्ने सम्भावना छैन ।

दुबै टिमका सम्भावित सुरुवाती–११
चेन्नई सुपर किंग्सः महेन्द्र सिंह धोनी (कप्तान), ऋतुराज गायकवाड, डेभोन कोनवे, अम्बाती रायडु, अजिंक्य रहाणे, मोइन अली, रविन्द्र जडेजा, शिवम दुबे, तुषार देशपांडे, मथिशा पथिराना र महिश तीक्षाना ।

सनराइजर्स हैदरावादः एडेन मार्कराम (कप्तान), मयंक अग्रवाल, राहुल त्रिपाठी, ह्यारी ब्रुक, अभिषेक शर्मा, वाशिंगटन सुन्दर, मार्को जानसेन, हेनरिक क्लासेन, भुवनेश्वर कुमार, थांगारासु नटराजन र मयंक मार्कण्डे ।