काठमाडौं । प्रहरीले गाडी र सवारी साधनका पाटपूर्जा चोरी गरेको आरोपमा काठमाडौंबाट दुई जनालाई पक्राउ गरेको छ ।
पक्राउ पर्नेमा मकवानपुरको इन्द्रसरोवर गाउँपालिका–२ घर भई हाल काठमाडौं कीर्तिपुर नगरपालिका–६ चोभार बस्ने २८ वर्षीय अशोक लामा र मकवानपुरको थाहा नगरपालिका–१२ घर भई हाल काठमाडौं चोभार बस्ने २३ वर्षीय किरण स्याङतान रहेका छन् ।
गत चैत ३० गते राति १० बजेको समयमा चोभारस्थित सुख्खा बन्दरगाहा अगाडि राजेन्द्र खड्काले पार्किङ गरी राखेको बा५ च ९६५७ नम्बरको गाडी हराएको र अन्दाजी राति ११ बजेतिर सोही वडाको चारघरेस्थित सुवर्ण महर्जनले सञ्चालन गरेको चक्रतिर्थ मल्टिपरपोज प्रालिको गोदाममा राखिएको सवारी साधनको पाटपूर्जाहरू चोरी भएको भनि प्रहरी वृत्त कीर्तिपुरमा सूचना प्राप्त भएपछि प्रहरीको टोली खटिएको थियो ।
खोजतलास गर्दै जाने क्रममा चोभार डाँडास्थित खाली चौरमा शंकास्पद रुपमा पार्किङ गरी राखिएको उक्त हराएको भनिएको गाडी र गाडीभित्र रहेका लामा र स्याङतानलाई पक्राउ गरिएको प्रहरीले जनाएको छ ।
पक्राउ परेका दुई जनालाई नियन्त्रणमा लिई अनुसन्धान गर्दा उक्त गाडी र सुवर्ण महर्जनको गोदामबाट चोरी भएका सामानहरू उनीहरूले नै चोरी गरेको खुलेको छ । पक्राउ परेका दुवै जनालाई चोरी सम्बन्धी कसुरमा आइतबार काठमाडौं जिल्ला अदालतबाट म्याद थप गरी अनुसन्धान भइरहेको प्रहरीले जनाएको छ ।
