एजेन्सी । इन्डियन प्रिमियर लिग (आईपीएल) अन्तर्गत आज बुधबार चेन्नई सुपर किंग्स र राजस्थान रोयल्सबीच प्रतिस्पर्धा हुँदैछ । खेल बेलुका ७ः४५ बजेदेखि चेन्नईको एमए चिदम्बरम (चेपक) स्टेडियममा सुरु हुनेछ । दुवै टोलीले प्रतियोगितामा अहिलेसम्म ३ खेल खेल्दा २ जित र १ हार बेहोरेका छन् ।
आईपीएलको उद्घाटन खेलमा चेन्नई सुपर किंग्स गुजरात टाइटन्ससँग पराजित भएको थियो । त्यसपछि टोलीले घरेलु मैदानमा लखनउलाई र मुम्बईमा मुम्बई इन्डियन्सलाई हराएको थियो । अजिंक्य रहाणे, मोइन अली, ऋतुराज गायकवाड र महेन्द्र सिंह धोनी टोलीका शीर्ष खेलाडी हुन् ।
रोयल्सविरुद्धको टोलीका ४ विदेशी खेलाडीमा मोइन अली, मिचेल सान्टनर, ड्वेन प्रिटोरियस र डेभन कोनवे हुन सक्छन् । यसबाहेक दीपक चाहर र बेन स्टोक्स केही खेलका लागि टोलीमा रहने छैनन् ।
पहिलो खेलमा हैदरावादलाई पराजित गरेको राजस्थान पञ्जावसँग भने ५ रनले पराजित भएको थियो । त्यसपछि फर्किएको टोलीले दिल्लीलाई ५७ रनले पराजित गर्यो । टोलीको शीर्ष क्रममा जोस बटलर, यशस्वी जैसवाल, सञ्जु सामसन र शिमरोन हेटमायरले उत्कृष्ट प्रदर्शन गरिरहेका छन् । त्यस्तै, बलिङमा युजभेन्द्र चहल र ट्रेन्ट बोल्टले लगातार विकेट लिएका छन् ।
चेन्नई विरुद्ध टोलीका ४ विदेशी खेलाडीमा बटलर, हेटमायर, बोल्ट र जेसन होल्डर हुन सक्छन् । यी बाहेक सामसन, जैसवाल र रविचन्द्रन आश्विनले पनि टोलीलाई बलियो बनाइरहेका छन् ।
घरेलु मैदानमा चेन्नई सुपर किंग्सको कीर्तिमान उत्कृष्ट छ । टोलीले यहाँ पछिल्ला २० मध्ये १७ खेल जितेको छ । मुम्बई इन्डियन्सले मात्रै ३ खेलमा उसलाई हराएको छ । यस्तो अवस्थामा राजस्थानका लागि यहाँ जित दर्ता गर्नु चुनौतीपूर्ण हुनेछ ।
सन् २००८ को आईपीएलको फाइनलमा दुवै टोली आमनेसामने भएका थिए । त्यतिबेला राजस्थानले जित हासिल गरेको थियो तर समग्रमा हेड टु हेड रेकर्डमा चेन्नई अगाडि छ । यी दुईबीच अहिलेसम्म २६ खेल भइसकेका छन् । जसमा १५ खेलमा चेन्नई र ११ खेलमा राजस्थान विजयी भएका छन् ।
चेपक रंगशालाको पिच स्पिनरका लागि उपयोगी मानिन्छ । तर यहाँको अन्तिम खेलमा सीएसकेले २१७ रन बनाएर खेल १२ रनले जितेको थियो । यस्तो अवस्थामा राजस्थानविरुद्ध पनि उच्च स्कोर हुने सम्भावना देखिन्छ । यहाँ आज वर्षाको सम्भावना छैन । बुधबार साँझको तापक्रम २९ देखि ३० डिग्री सेल्सियसको बीचमा रहनेछ ।
दुवै टिमका सम्भावित सुरुवाती–११
चेन्नई सुपर किंग्सः महेन्द्र सिंह धोनी (कप्तान र विकेटकीपर), डेभोन कोनवे, ऋतुराज गायकवाड, अजिंक्य रहाणे, मोइन अली, अम्बाती रायडु, शिवम दुबे, रविन्द्र जडेजा, ड्वेन प्रिटोरियस, मिचेल सान्टनर र तुषार देशपांडे ।
राजस्थान रोयल्सः सञ्जु सैमसन (कप्तान र विकेटकीपर), जोस बटलर, यशस्वी जैसवाल, ध्रुव जुरेल, रियान पराग, शिमरोन हेटमायर, रविचन्द्रन अश्विन, जेसन होल्डर, युजवेन्द्र चहल, केएम आसिफ र ट्रेन्ट बोल्ट ।
अंकतालिकाः
