काठमाडौं । राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाहीले वर्तमान सरकारले व्यक्तिगत इगो साँट्न राज्यसत्ताको चरम दुरुपयोग गरिरहेको आरोप लगाउनुभएको छ ।
सोमबार संघीय संसद् भवन परिसरमा सञ्चारकर्मीसँग कुरा गर्दै नेता शाहीले विधि र प्रक्रिया मिचेर गरिएका गिरफ्तारीले सरकारको छवि धुमिल बनाएको बताउनुभयो ।
पूर्वप्रधानन्यायाधीश चोलेन्द्रशमशेर जबरा र व्यवसायी दुर्गा प्रसाईंको गिरफ्तारीको प्रसंग उल्लेख गर्दै उहाँले कानुनी राज्यको उपहास भएको जिकिर गर्नुभयो । भ्रष्टाचार र अपराध अनुसन्धानमा सरकारले छनोटपूर्ण व्यवहार गरिरहेको आरोपसमेत उहाँले लगाउनुभयो ।
शाहीले कुनै पनि व्यक्तिलाई कानुनी प्रक्रियाबाहिर गएर पक्राउ गर्न नहुने बताउँदै पक्राउ गर्दा कानुनी आधार र अदालतको पक्राउ पुर्जी आवश्यक पर्ने उल्लेख गर्नुभयो । उहाँले प्रमाणबिना राति पक्राउ गरेर पछि छाड्ने कार्यलाई ‘बालहठ’को संज्ञा दिनुभयो ।
‘कोही पनि व्यक्तिलाई पक्राउ गर्नुहुन्न भन्ने होइन, तर पक्राउ गर्दा कानुनी आधार र अदालतको पक्राउ पुर्जी अनिवार्य हुनुपर्छ,’ उहाँले भन्नुभयो, ‘प्रमाणबिना राति ३ बजे पक्राउ गर्नु र पछि छाड्नु बालहठ मात्र हो ।’
भ्रष्टाचारका विभिन्न प्रकरणमा आरोपित व्यक्तिहरू खुला हिँडिरहेको दाबी गर्दै शाहीले सरकारले व्यक्तिगत प्रतिशोधका लागि मात्रै शक्ति प्रयोग गरेको आरोप लगाउनुभयो । उहाँले विगत र वर्तमान सरकारको कार्यशैलीमा फरक देखिन छाडेको पनि बताउनुभयो ।
शाहीले सरकारलाई सुशासनको मार्गमा अघि बढ्न आग्रह गर्दै भ्रष्टाचारविरुद्ध वास्तविक कदम चालिए आफ्नो दलले सरकारलाई सहयोग गर्ने प्रतिबद्धता जनाउनुभयो । तर राज्यसत्ताको दुरुपयोग जारी रहे जनता सडकमा आउन बाध्य हुने चेतावनी उहाँले दिनुभयो ।
