काठमाडौँ । नेपाल राष्ट्र बैंकका गभर्नर महाप्रसाद अधिकारीले नेपालको वित्तीय क्षेत्र सुरक्षित रहेको भन्दै सानातिना धक्काले अर्थतन्त्र अप्ठ्यारोमा नपर्ने बताउनुभएको छ ।
मंगलबार काठमाडौँमा वर्तमान आर्थिक तथा वित्तीय अवस्थाबारे आयोजित पत्रकार सम्मेलनमा उहाँले चालु खाता घाटा, शोधानान्तर स्थिति र विदेशी मुद्राको सञ्चितिमा सुधार हुँदै गएको जानकारी दिनुभयो ।
वास्तविक क्षेत्रमा आएको शिथिलताले केही अप्ठ्यारो स्थिति सिर्जना भएको थियो भन्दै उहाँले आगामी दिनमा अर्थतन्त्र क्रमश: सुधार हुने बताउनुभयो ।
गभर्नर अधिकारीले मुद्रास्फीति घट्ने क्रममा रहेको र रेमिट्यान्स भित्रिने क्रम बढ्दो अवस्थामा रहेको समेत बताउनुभयो । उहाँका अनुसार मंसिरदेखि फागुनसम्म मासिक १ खर्बभन्दा बढी रेमिट्यान्स भित्रिएको छ ।
पत्रकार सम्मेलनमा उहाँले चालु खाता घाटामा उल्लेख्य सुधार आएको जानकारी दिँदै विदेशी विनिमय सञ्चिति सुविधाजनक अवस्थामा रहेको उल्लेख गर्नुभयो ।
गभर्नर अधिकारीले बैंकहरुलाई उच्च मनोबलका साथ काम गर्न निर्देशन पनि दिँदै भन्नुभयो, “बैंकिङ प्रणालीमा तरलता सुधार हुँदै गएको छ, ब्याजदर केही माथि नै छ, आधार दर र निक्षेपको औसत ब्याजदर घट्ने क्रममा छ।”
