काठमाडौँ । सहिद स्मारक ए डिभिजन लिग अन्तर्गत नेपाल पुलिस क्लबले पहिलो जित निकालेको छ । एन्फा कम्प्लेक्समा सोमबार दिउँसो भएको खेलमा पुलिसले फ्रेन्ड्स क्लबलाई ३–१ ले हराएको हो । विदेशी खेलाडी भित्र्याएसँगै पुलिसले पहिलो जित निकाल्न सफल भएको हो । खेलमा चारै गोल दोस्रो हाफमा भए ।
पुलिसका तर्फबाट मोसेस टुमले ५१ औं मिनेटमा गोल गरे । त्यसपछि बुद्धबल तामाङले ५८ र ९० औं मिनेटमा दुई गोल गरे । फ्रेन्ड्सका लागि एक मात्र गोल टोरिक जेबरिनले ८७ औं मिनेटमा गरे ।
पुलिसले यो नतिजासँगै चार अंक जोडेको छ । चारै अंक रहेको फ्रेन्ड्स तालिकाको पुछारमा रहेको छ । दुबै टोली तालिकाको अन्तिम दुई स्थानमा छन् ।
सोमबार नै दशरथ रंगशालामा भएको अर्को खेलमा एपीएफ र चर्च ब्वाइजले गोलरहित बराबरी खेलेका छन् ।
