काठमाडौँ । लोकतान्त्रिक समाजवादी पार्टी (लोसपा) नेपालले जसपाका अध्यक्ष उपेन्द्र यादवलाई जिताउन चुनावी कमाण्डर खटाएको छ । वैशाख १० गते बारा–२ मा हुने उपनिर्वाचनमा भने यादवलाई सघाउन चुनावी कमाण्डर खटाएको हो ।
यसअघि मंसिर ४ मा सम्पन्न प्रतिनिधिसभा चुनावमा यादवलाई हराउन भूमिका खेलेको लोसपाले यसपटक भने पार्टीका मधेशप्रदेश अध्यक्ष जितेन्द्र सोनललाई सो क्षेत्रका लागि चुनावी कमाण्डरको रुपमा खटाएको छ ।
आम निर्वाचनमा सप्तरी–२ मा यादवलाई हराउनका लागि तत्कालीन पाँच दलीय गठबन्धनले जेपी ठाकुरलाई उम्मेदवारी दिन लगाएको थियो । सो निर्वाचनमा जनमत पार्टीका अध्यक्ष सिके राउत निर्वाचित भएका थिए । अहिले भने लोसपाले बारामा हुने उपनिर्वाचनमा उम्मेदवार बनेका अध्यक्ष यादवलाई जिताउन कमाण्डर नै खटाएको हो । सो क्षेत्रमा जनमत पार्टीका शिवचन्द्र कुशवाहा उम्मेदवार बनेका छन् ।
बारा–२ मा लोसपाका नेता राजेन्द्र महतोले पनि उम्मेदवारी दिने इच्छा देखाएका थिए तर अध्यक्ष ठाकुर उनलाई रोकेर उपेन्द्र यादवलाई सघाउन अघि सरेका हुन् ।
