साउथह्याम्पटन । बुधबार न्युजिल्यान्डले भारतलाई छैटौँ दिन ८ विकेटले पराजित गर्दै विश्व टेस्ट च्याम्पियनसिपको उपाधी हात पारेको छ । छैटौं रिजर्भ दिन पुगेको खेलमा भारतको फिल्डिङ निकै फितलो रह्यो र लगातार क्याच छाडेको थियो जसको फाईदा न्युजिल्यान्डले उठाएर १ सय ३९ रनको लक्ष्य दुई विकेट गुमाएर पूरा गरेको थियो । न्युजिल्यान्डका लागि कप्तान केन विलियम्सन ५२ रन, रस टेलरले ४७ रन बनाएका थिए । उनीहरूले दोस्रो विकेटका लागि ९६ रनको नटआउट साझेदारी गरे । उनीहरूले दुई विकेट गुमाएर ४४ रनको स्थितिबाट न्युजिल्यान्डलाई शानदार जितसम्म पुर्याएका थिए ।
यसअघि भारत आफ्नो दोस्रो इनिङ्समा १ सय ७० रन बनाएर अलआउट भएको थियो । भारतले दुई विकेट गुमाएर ६४ रनबाट अगाडि खेल्न सुरु गरेको थियो। भारतका लागि अघिल्लो दिन नटआउट रहेकामध्ये कप्तान विराट कोहलीले १३ र चेतेश्वर पुजाराले १५ रन मात्रै जोडे ।
ऋषभ पन्तले भारतका लागि बनाएको ४१ रन नै सर्वाधिक ठूलो व्यक्तिगत स्कोर रह्यो । यस्तै रवीन्द्र जडेजाले १६ र मोहम्मद सामीले १३ रन बनाए । न्युजिल्यान्डका बलरमध्ये टिम साउथी सर्वाधिक घातक रहे र उनले ४८ रन खर्चिएर चार विकेट लिए । यस्तै ट्रेन्ट बोल्टले तीन र केली जेमिसनले एक विकेट लिए ।
