काठमाडौँ । आईसीसी विश्वकप लिग टूको अन्तिम त्रिकोणात्मक सिरिजमा यूएईविरुद्धको खेलमा कप्तान रोहित पौडेल ‘प्लेयर अफ द म्याच’ बनेका छन् ।
नेपाललाई १ सय ७७ रनको कीर्तिमानी जित दिलाउन रोहितले ७७ रनको अर्धशतकीय इनिङ खेलेका थिए। २२–३ को खराब अवस्थाबाट टोलीलाई पूनरागमन गराउन रोहितले १ सय १२ बलमा ९ चौकासहित उत्कृष्ट प्रदर्शन गरेका थिए । उनको अर्धशतकमा नेपाल ४९।२ ओभरमा २ सय ४८ रन बनाउन सफल रह्यो ।
२४९ रनको विजयी लक्ष्य पछ्याएको यूएईले २२.५ ओभरमै अलआउट हुँदै ७१ रन बनाएको थियो ।
यूएईमाथि १ सय ७७ रनको कीर्तिमानी जित हात पार्दै नेपालले आगामी चार वर्षको लागि ओडीआई मान्यता पक्का गरेको छ । यसैबीच यूएईले भने नेपालसँगको हारसँगै सोझै ओडीआई मान्यता बचाउने अवसर गुमाएको छ । अब नेपालले बाँकी दुवै खेल जितेको खण्डमा सोझै विश्वकप छनोट खेल्न पाउनेछ ।
