काठमाडाैँ । सत्तारुढ राष्ट्रिय स्वतन्त्र पार्टीकी सांसद पुनमकुमारी अग्रवालले मुलुकको निर्वाचन प्रणालीलाई आधुनिक र प्रविधिमैत्री बनाउनु आजको आवश्यकता भएको बताउनुभएको छ ।
मङ्गलवार संसदीय सुनुवाई समितिमा प्रश्तावित निर्वाचन आयुक्त डा. राजीव सुब्बाको सुनुवाईका क्रममा बोल्दै उहाँले निर्वाचनमा प्रविधिको प्रयोग, यसको सुरक्षा र समावेशिताका विषयमा धारणा राख्नुभएको हो ।
सांसद अग्रवालले आधुनिक युगमा प्रविधि भित्र्याउनु अपरिहार्य भएपनि यसको सुरक्षा र दीर्घकालीन कार्यान्वयनको पक्ष चुनौतीपूर्ण रहेको उल्लेख गर्नुभयो । निर्वाचनलाई पेपरलेस बनाउँदा राज्यको भार कम हुने र उम्मेदवार तथा मतदाताको खर्च समेत न्युनिकरण हुने उहाँको तर्क छ । निर्वाचनका क्रममा मतदाताले भोग्नुपर्ने सास्ती र खर्चका कारण धेरै नागरिक मतदान प्रक्रियाबाट बाहिर रहेको चर्चा गर्दै सांसद अग्रवालले निर्वाचनलाई थप समावेशी बनाउनुपर्नेमा जोड दिनुभयो ।
स्थानीय र प्रदेश तहमा प्रविधिको प्रभावकारी प्रयोगबारे जिज्ञासा राख्दै उहाँले जनताले अहिले तत्काल परिणाम खोजिरहेको उल्लेख गर्नुभयो । निर्वाचनको परिणामका लागि लामो समय कुर्नुपर्ने अवस्थाको अन्त्य हुनुपर्ने उहाँको भनाइ छ । सांसद अग्रवालले विदेशमा रहेका नेपाली नागरिकहरूलाई चाँडोभन्दा चाँडो मताधिकार प्रदान गर्ने विषयलाई अहिलेको प्राथमिक आवश्यकताका रूपमा उठाउनुपर्ने बताउनु भयो ।
