काठमाडौँ । नेकपा एमालेले उपराष्ट्रपतिका लागि उम्मेदवारी दर्ता गराएका जनता समाजवादी पार्टीका नेता रामसहायप्रसाद यादवको उम्मेदवारीविरुद्ध उजुरी दर्ता गराएको छ ।
यादवको उम्मेदवारी संविधान र कानुनविपरीत रहेको भन्दै एमालेले उजुरी दिएको हो । उपराष्ट्रपति पदका लागि एमालेबाट उम्मेदवारी दिएकी अष्टलक्ष्मी शाक्य (बोहरा)को प्रतिनिधि एवं सांसद महेश बर्तौलाले नयाँ बानेश्वरस्थित निर्वाचन अधिकृतको कार्यालयमा शनिबार उजुरी दर्ता गरेका हुन् ।
राष्ट्रपतिमा पुरुष निर्वाचित भइसकेकाले उपराष्ट्रपति पनि पुरुष हुन नहुने भन्दै एमालेले जसपाका उम्मेदवार यादवविरुद्ध उजुरी दिएको जनाएको छ । यस्तै यादवको उम्मेदवारी कानुनविपरीत रहेको समेत एमालेले दाबी गरेको छ ।
यसैबीच जसपाबाट उम्मेदवारी दिएका यादवको नाममा शुक्रबार नै प्रश्न उठ्न थालेपछि सोही पार्टीबाट प्रमिला यादवले पनि उपराष्ट्रपतिमा उम्मेदवारी दर्ता गराएकी छन् । उपारष्ट्रपतिमा सत्ता गठबन्धनबाट तीन जना र नेकपा एमालेबाट एक गरी चार जनाको उम्मेदवारी परेको छ ।
