काठमाडौँ । आइसिसी विश्वकप लिग–२ त्रिकोणात्मक ओडिआई सिरिजमा घरेलु टोली यूएईविरुद्धको रोमाञ्चक जितपछि नेपाल अंक तालिकामा पाँचौं स्थानमा उक्लिएको छ ।
यूएईलाई अन्तिम खेलमा ४२ रनले हराउँदै नेपालले अंक तालिकामा एक स्थान सुधार गरेको हो । यूएई ३२ खेलमा १४ मा जित र १५ मा हारसहित ३१ अंकका साथ छैटौं स्थानमा छ ।
नेपाल ३२ खेलमा १५ मा जित र १५ मा हारसहित ३२ अंकका साथ पाँचौं स्थानमा छ । अब नेपालले घरेलु मैदान टियुमा पपुवा न्युगिनी र युएईसँग दुई–दुई खेल खेल्नेछ ।
नेपाललाई शीर्ष तीनमा रहँदै सोझै विश्वकप छनोट खेल्न बाँकी सबै खेल जित्नुपर्ने दबाब छ । अर्कोतर्फ ओडिआई मान्यता जोगाउन नेपाललाई चार मध्ये दुई जित पर्याप्त हुनेछ ।
