काठमाडौँ। जनता समाजवादी पार्टी, नेपालका अध्यक्ष उपेन्द्र यादवले मधेसलाई अधिकार सम्पन्न बनाउन सडक संघर्ष आवश्यक रहेको बताउनुभएको छ ।
उहाँले संघीयता, स्वायत्तता र स्वशासनलाई बलियो बनाउँदै संविधान संशोधन गर्नुपर्ने बताउनुभएको हो । शनिवार जनकपुरमा अग्रगामी मोर्चाले आयोजना गरेको कार्यक्रममा बोल्दै यादवले जलवायु परिवर्तनबाट नेपालले भोगिरहेको क्षतिको क्षतिपूर्ति तथा जलवायु न्यायका लागि अन्तर्राष्ट्रिय मञ्चमा आवाज उठाउन सरकारसँग मागसमेत गर्नुभयो ।
औद्योगिक रूपमा शक्तिशाली राष्ट्रबाट भएको प्रदूषणका कारण नेपालजस्ता मुलुकले क्षति व्यहोर्नुपरेको उहाँको भनाइ छ । यादवले नेपालमा संघीय लोकतान्त्रिक गणतन्त्र, समावेशिता, धर्मनिरपेक्षता र नागरिक स्वतन्त्रता विगतका आन्दोलन र संघर्षबाट प्राप्त उपलब्धि भएको बताउनु भयो । यी उपलब्धिलाई उल्ट्याउन खोज्ने शक्तिहरू प्रतिगामी र परिवर्तनविरोधी भएको उहाँको आरोप छ ।
उहाँले वर्तमान राजनीतिक तथा आर्थिक संकटका लागि नेकपा एमाले नेतृत्वको सरकारलाई जिम्मेवार ठहर गर्दै सरकार भ्रष्टाचार, कमिसनतन्त्र र दलालतन्त्रमा फसेको आरोप लगाउनु भयो ।
युवा आन्दोलनमाथि दमन गर्न खोजिएकै कारण जनआक्रोश विस्फोट भएको उहाँको दाबी छ । मधेसको वर्तमान प्रदेश संरचनाले वास्तविक स्वशासन सुनिश्चित नगरेको यादवको भनाइ छ । ‘आफ्नो पुलिस, प्रशासन, न्याय, शासन र कानून नभएसम्म आफ्नो राज्य भएको अनुभूति हुँदैन’ भन्दै उहाँले मधेसमा स्वशासन र स्वायत्तता आवश्यक रहेको बताउनु भयो ।
यादवले मधेस प्रदेशलाई थप अधिकारसहितको स्वायत्त शासनको संरचनामा लैजान संविधान संशोधन आवश्यक रहेको बताउनु भयो । जनसंख्याका आधारमा प्रतिनिधित्व र राज्यका निकायमा पछाडि परेका, सीमान्तकृत तथा आर्थिक रूपमा विपन्न समुदायको सहभागिता सुनिश्चित गर्नुपर्ने उहाँको माग छ ।
उहाँले राष्ट्रिय स्वतन्त्र पार्टीले समेत संविधान संशोधन र संघीयता सुदृढीकरणको कुरा गर्दै आएको स्मरण गराउँदै अहिले त्यस विषयमा स्पष्ट रूपमा अघि बढ्नुपर्ने बताउनु भयो ।
यादवले संसदबाट अपेक्षित अधिकार प्राप्त हुन नसके सडकबाट संघर्ष अघि बढाउनुपर्ने बताउनु भयो । ‘सडकबाट अधिकार बनाइन्छ,
सडकबाट इतिहास बनाइन्छ र सडकबाटै मुक्ति प्राप्त हुन्छ’ भन्दै उहाँले अग्रगामी मोर्चालाई थप विस्तार गर्नुपर्ने बताउनु भयो ।– न्युज एजेन्सी नेपाल
