काठमाडौं । एमालेले यसअघि पार्टीबाट विभाजित भएर गएको एकीकृत समाजवादीसँग पार्टी एकीकरणको प्रस्ताव गरेको छ । एमाले नेताहरू राष्ट्रपतिमा सुवास नेम्वाङका लागि भोट माग्न एकीकृत समाजवादीको कार्यालय पुग्दा पार्टी एकता’दयगत पनि छलफल गरेका हुन् ।
एमालेबाट राष्ट्रपतिका लागि उम्मेदवार भएका नेम्वाङका लागि मत माग्दै एमाले नेताहरू बिहीबार एकीकृत समाजवादीको केन्द्रीय कार्यालय आलोकनगर, काठमाडौं पुगेका थिए । गत साता एमाले अध्यक्ष केपी शर्मा ओलीले एकीकृत समाजवादीका अध्यक्ष माधवकुमार नेपाललाई एक पत्र लेख्दै राष्ट्रपतिका उम्मेदवार नेम्वाङलाई मतदान गर्न आग्रह गरेका थिए ।
यसअघि ओलीले राष्ट्रपतिमा नेपाललाई उम्मेदवार बनाउन प्रस्ताव गरेका थिए । पछिल्लो समय एमाले अध्यक्ष ओलीले एकीकृत समाजवादीसँग सहकार्य मात्रै नभई पार्टी एकताका लागिसमेत पहल थालेका छन् । ओलीको सो पहललाई एकीकृत समाजवादीका नेताले सकारात्मकरूपमा लिँदै छलफलका लागि ‘ढोका’ खुलेको टिप्पणी गरेका छन् ।
एकीकृत समाजवादीको केन्द्रीय कार्यालय पुगेका एमाले नेताले नेम्वाङको पक्षमा मतदान गर्न आग्रह गर्दै पार्टी एकता गर्नुपर्नेमा जोड दिएका थिए । नेम्वाङले अध्यक्ष नेपाललाई राष्ट्रपति निर्वाचनमा मतदान गरेर सघाउन आग्रह गरे । नेम्वाङसँगै एमाले उपाध्यक्ष विष्णु पौडेल र उपमहासचिव तथा प्रचार विभाग प्रमुख पृथ्वीसुब्बा गुरुङ, सचिव रघुवीर महासेठ र नेता विमला राई सहभागी थिए ।
भेटघाटमा एकीकृत समाजवादीका अध्यक्ष नेपालसहित उपाध्यक्ष प्रमेश हमाल, महासचिव डा. वेदुराम भुसाल, उपमहासचिव प्रकाश ज्वाला र सचिवालय सदस्य रामचन्द्र झासमेत सहभागी थिए । एमाले र एकीकृत समाजवादीका शीर्ष नेताबीच पार्टी विभाजनपछि एकीकृत समाजवादीको केन्द्रीय कार्यालयमा यो पहिलो औपचारिक भेटघाट हो । एमाले प्रवक्ता गुरुङले राष्ट्रपति निर्वाचनमा आफ्नो उम्मेवारलाई मत दिन अनुरोध गरेको बताए ।
उनले आफ्नो दलले अघि सारेको उम्मेदवार नेम्वाङलाई मत मागेको र दुई पार्टीलाई एकता बनाउने कुरा राखेको जानकारी दिए । ‘राष्ट्रपति निर्वाचनका लागि एकीकृत समाजवादीको कार्यालयमा पहिलोपटक आएर भेटेका छौं,’ गुरुङले भने, ‘अहिले पार्टी एकता पनि गर्ने चुनौतीबीच अवसरसमेत प्राप्त भएको कुरा हामीले राखेका छौं । यो चुनौतीबीच अवसर प्राप्त भएको छ, यसलाई अघि बढाउनुपर्छ ।’ एमालेका तर्फबाट राष्ट्रपतिका उम्मेदवार नेम्वाङलाई सहयोग गर्न गरेको आग्रहमा एकीकृत समाजवादीले अर्का उम्मेदवार रामचन्द्र पौडेलको प्रस्तावक बनिसकेको जवाफ फर्काएको छ ।
एमालेले सौहार्दपूर्ण सम्बन्धका लागि सुरु गरेको प्रयास स्वागतयोग्य भएको एकीकृत समाजवादीका नेताले बताए । एकीकृत समाजवादीका उपमहासचिव एवं प्रवक्ता जगन्नाथ खतिवडाले नेम्वाङसहितको टोलीले राष्ट्रपतिमा सहयोगको अपील गरेको बताए । उनले एमालेसँग पहिलोपटक औपचारिक भेटवार्ता भएकोमा अध्यक्ष नेपालले धन्यवाद दिएको बताए ।
एमालेले औपचारिक संवाद सुरु गरेकोमा खुसी लागेको खतिवडाले बताए । तर, बुधबार बसेको केन्द्रीय सचिवालयको बैठकले पौडेललाई राष्ट्रपतिमा सहयोग गर्ने निर्णय गरिसकेकाले दायाँबायाँ नहुने उनको भनाइ छ । प्रवक्ता खतिवडाले एकीकृत समाजवादीकै अस्तित्वमाथि पटकपटक प्रश्न उठाउने पार्टी केन्द्रीय कार्यालयमै औपचारिक प्रस्ताव लिएर आउनु खुसीको कुरा भएको बताए ।
‘नेकपा एमालेले हाम्रो अस्तित्वमाथि अनेकौंपटक अनेकौं कुरा भनेको छ । तर, त्यही पार्टीले पार्टी केन्द्रीय कार्यालयमा आएर औपचारिक कुराकानी गर्नु त खुसीको कुरा नै हो । बल्लबल्ल दुई पार्टीबीच भेटघाट भएको छ । सौहार्दपूर्ण सम्बन्ध र मित्रता विकास गर्न एमालेले सुरु गरेको प्रयास स्वागतयोग्य छ,’ उनले भने ।
एमालेद्वारा रास्वपा र राप्रपासँग पनि छलफल राष्ट्रपतिको निर्वाचनमा उम्मेदवार रहेका नेम्वाङलाई मतदान गर्न एमालेले एकीकृत समाजवादीका साथै राष्ट्रिय स्वतन्त्र पार्टी ९रास्वपा० र राष्ट्रिय प्रजातन्त्र पार्टी ९राप्रपा०सँग समेत बिहीबार छलफल गरेको छ । एमाले नेता रास्वपा र राप्रपाको छुट्टाछुट्टै ठाउँमा रहेको कार्यालयमा पुगेर छलफल गरेका छन् ।
एमालेका सचिव योगेश भट्टराईले २५ फागुनमा हुने राष्ट्रपतिको निर्वाचनमा रास्वपाले आफूहरूले अघि सारेको उम्मेदवारलाई मत दिने दाबी गरेका छन् । रास्वपाको पार्टी कार्यालय धुम्बाराही पुगेर नेतालाई भेटेपछि भट्टराईले रास्वपाका सभापति रवि लामिछाने आफ्नो दल आन्तरिक छलफलमा रहेको जवाफ दिएको बताए । एमालेसँग केही समय सहकार्य पनि गरेकाले नेम्वाङजत्तिको व्यक्तित्व बन्नुपर्ने आफूहरूको मत भएको तर अहिले पार्टीमा छलफल गरिरहेको लामिछानले जवाफ दिएको भट्टराईले बताए ।
‘उहाँको भनाइ र बडी ल्यांग्वेजले हेर्दा राष्ट्रिय स्वतन्त्र पार्टीको मत राष्ट्रपतिमा सुवास नेम्वाङले पाउने देखिन्छ,’ भट्टराईले भने । सबै दलसँग कुरा गर्ने प्रक्रियामा रहेको र त्यही क्रममा रास्वपासँग छलफल गरेको उनले बताए । संविधानसभामा सफल भूमिका खेलेको र सभामुखका रूपमा पनि सफल भएकाले उपयुक्त हुने तर्क आफूहरूले राखेको उनले बताए । एमाले नेताहरू राप्रपाको केन्द्रीय कार्यालय वसुन्धारासमेत पुगेका छन् ।
मत माग्न केन्द्रीय कार्यालय वसुन्धारा पुगेका नेम्वाङसहित एमाले नेतालाई पार्टीभित्र छलफल गर्न बाँकी रहेको बताइएको राप्रपाका महामन्त्री मुकुल ढकालले बताए । ‘उहाँ ९नेम्वाङ० राष्ट्रपतिका लागि उपयुक्त पात्र हो भन्नेमा संकोच छैन तर पार्टीले निर्णय गर्न बाँकी छ । त्यसैले निर्णय आज नै गर्न सकिँदैन भन्यौं,’ ढकालले भने ।
राष्ट्रपतिमा कसलाई भोट दिने भन्ने विषयमा आफ्नै केन्द्रीय समिति र संसदीय समितिको संयुक्त बैठकबाट निर्णय गरिने उनले बताए । राष्ट्रपतिको निर्वाचन २५ फागुनमा हुँदै छ । राष्ट्रपतिका लागि एमालेबाट नेम्वाङ र आठ दलीय गठबन्धनबाट कांग्रेसका रामचन्द्र पौडेल उम्मेदवार छन् । राजधानी दैनिक
