काठमाडौँ । नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत आज पपुवा न्युगिनी (पिएनजी)सँग खेल्दैछ ।
नेपाल र पिएनजीबीचको खेल नेपाली समय अनुसार मध्यान्ह ११ः४५ बजे दुबई इन्टरनेशल क्रिकेट स्टेडियममा सुरु हुनेछ । नेपाल लिग–२ मा लगातार पाँचौं जित निकाल्ने सोचका साथ मैदान उत्रनेछ ।
नेपालको कप्तानी रोहित पौडेलले गर्नेछन् भने पपुवा न्युगिनी असाद भालाको कप्तानीमा मैदान उत्रनेछ । २८ खेलमा १२ मा जित र १४ मा हारसहित २६ अंकका साथ छैटौं स्थानमा रहेको नेपाललाई शीर्ष तीनमा रहँदै सोझै विश्वकप छनोट खेल्न बाँकी ८ मध्य ७ खेल जित्नुपर्ने हुन्छ । यस्तै, शीर्ष पाँचमा रहँदै सोझै ओडिआई मान्यता जोगाउन नेपालले कम्तिमा पाँच खेल जित्नुपर्ने हुन्छ ।
२८ खेलमा २ मा जित र २५ मा हारसहित पुछारमा रहेको पपुवा न्युगिनी भने क्वालिफायर प्लेअफ खेल्ने पक्का भएको छ । नेपाल, पपुवा न्युगिनी र युएईबीचको त्रिकोणात्मक सिरिज पपुवा न्युगिनीमा हुनुपर्ने भएपनि खेल्न योग्य संरचना नभएपछि युएईमा सारिएको हो ।
२०१९ देखि जारी रहेको विश्वकप लिग टूको सिरिजमा नेपालको यो विदेशमा हुने अन्तिम त्रिकोणात्मक सिरिज पनि समेत रहेको छ ।
गत वर्ष भएको लिग टू शृङ्खलामा नेपालले पिएनजीलाई दुवै खेलमा पराजित गरेको थियो । तर लगत्तै नेपालमा भएको नेपाल र पिएनजीबीचको दुई खेलको शृङ्खला भने पिएनजीले जितेको थियो ।
नेपाल र पिएनजीबीच २०२१ सेप्टेम्बरमा ओमानमा पहिलो पटक दुई पक्षीय ओडिआई शृङ्खला भएको थियो । जसमा नेपालले दुवै खेल जितेको थियो । नेपालले पीएनजीलाई पहिलो खेलमा २ विकेटले र दोस्रो खेलमा १५१ रनले हराएको थियो । लिग टू मा तीनवटै टिम आफ्नो आठौं शृङ्खला खेल्दैछन् । यसपछि नवौँ तथा लिग टूको अन्तिम शृङ्खला नेपालमा लगत्तै हुनेछ ।
नेपालले यसै साता घरेलु मैदान टियुमा नामिबिया र स्कटल्याण्डसँगको त्रिकोणात्मक ओडिआई सिरिजमा सबै चारै खेल जितेको थियो ।
