एजेन्सी । इंग्लिस प्रिमियर लिग फुटबल अन्तर्गत आर्सनलले रोमाञ्चक जित निकालेको छ ।
शनिबार राति सम्पन्न खेलमा आर्सनलले एस्टन भिल्लालाई ४–२ गोलले पराजित गरेको हो । भिल्लाको घरेलु मैदानमा आर्सनलले अग्रता उल्ट्याएर जित निकालेको हो ।
खेलको पाँचौं मिनेटमा नै वली वाट्कीन्सले गोल गर्दै भिल्लालाई सुरुवाती अग्रता दिलाएका थिए । १६ औं मिनेटमा बुकायो साकाले गोल गर्दै आर्सनललाई १–१ को बराबरीमा ल्याए । ३१ औं मिनेटमा फिलिपे कोउटिन्होले गोल गर्दै भिल्लालाई २–१ ले अघि बढाए । यता, ६१ औं मिनेटमा ओलेक्सान्ड्र जिन्चेन्कोले गोल गर्दै आर्सललाई २–२ को बराबरीमा ल्याए ।
खेल सकिनै लाग्दा इन्जुरी समयको ९०+३ मिनेटमा भिल्लाका गोलकिपर मार्टिनेजले आत्मघाती गोल गरेपछि आर्सनललाई ३–२ को अग्रता मिल्यो । आर्सनलका जर्गिन्होले टाढाको दुरीबाट प्रहार गरेको बल पोस्ट बारमा लागेर फिर्ता हुँदा मार्टिनेजलाई लागेर गोल हुन पुगेको थियो ।
यस्तै खेलको अन्तिम मिनेटमा मार्टिनेलीले गोल गर्दै आर्सनललाई ४–२ को जित दिलाए । भिल्लाका गोलकिपर मार्टिनेज कर्नरमा गोल गर्ने मनसायले आर्सनलको पोस्टमा गएको बेला आर्सनलले काउन्टर पायो । खाली पोस्टमा मार्टिनेलीले कुनै गल्ती गरेनन् ।
जितसँगै आर्सनल पुनः तालिकाको शीर्षस्थानमा उक्लिएको छ । उसको २३ खेलबाट ५४ अंक छ । भिल्ला भने समान खेलबाट २८ अंकसहित ११ औं स्थानमा रहेको छ ।
