काठमाडौँ । मानव अधिकार तथा शान्ति समाजले वाग्मती र कर्णाली प्रदेशमा ‘जनयुद्ध दिवस’ को अवसर भन्दै भोलि फागुन १ गते दिइएको सार्वजनिक बिदाप्रति तीव्र असहमति र गम्भीर आपत्ति प्रकट गरेको छ ।
वाग्मती प्रदेश सरकारले माघ २४ गते र त्यसभन्दा अघि कर्णाली प्रदेश सरकारले ‘जनयुद्ध दिवस’ का अवसरमा फागुन १ गते सार्वजनिक बिदा दिने निर्णय गरेका छन् ।
“यो विवादास्पद निर्णयले लोकतन्त्र र अहिंसाका सार्वभौम मान्यताको प्रतिकूल छ भन्ने शान्ति समाजको धारणा रहेको छ”, समाजले एक विज्ञप्ति जारी गर्दै भनेको छ ।
यसैगरी समाजले माघ २७ गते काठमाडौँमा राष्ट्रपति विद्यादेवी भण्डारीको आवागमनको सन्दर्भलाई जोडेर सडकमा निस्किएको भन्दै चिकित्सक कुट्ने प्रहरी कृत्यको निन्दा गरेको छ ।
राजतन्त्र उन्मूलन भइसकेपछि पनि त्यसैको अवशेषका रुपमा नागरिकलाई सास्ती दिनेगरी कायम रहेको कथित ‘सवारी’ प्रक्रिया लोकतान्त्रिक गणतन्त्रको मर्म विपरित रहेको समाजले जनाएको छ ।
