काठमाडौं । नेपाली कांग्रेसका वरिष्ठ नेता रामचन्द्र पौडेल धर्मशालामा पुगेका छन् । शनिबार पार्टीको क्रियाशील सदस्य छानबिनबारे बुझ्न नेता पौडेल गौशालास्थित नेपाल भारतमैत्री धर्मशालामा पुगेका हुन् ।
समिति संयोजक रमेश लेखकले ६४ जिल्लाको काम टुंगिएको र ५७ जिल्लाको क्रियाशील सदस्यता छपाई सकिएको जानकारी गराएका पनि उनले समितिले क्रियाशील सदस्यतामाथि परेका उजुरीलाई विवादरहित ढंगले टुंगो लगाउने काम गरिरहेको नेता पौडेललाई जानकारी गराएका थिए ।
नेता पौडेलले समितिको कामको प्रशंसा गर्दै निष्पक्ष रुपमा सदस्यता टुंग्याउन आग्रह गरे । ‘तपाईंहरुले मेहनत गर्नुभएको छ, अहोरात्र खटेर काम गर्नुभएको छ, निष्पक्ष रुपमा काम गर्नुस्,’ पौडेलले भने, ‘महाधिवेशन समयमै गर्ने जिम्मा तपाईंहरुको काँधमा आएको छ ।’
नेता पौडेलले सदस्यता छपाई, कम्युटरमा सदस्यताको नाम इन्ट्रीलगायतका कामको निरीक्षण गरेका थिए । कांग्रेसले भदौ १६–१९ गतेसम्म पार्टीको १४ औं महाधिवेशन गर्ने गरी कार्यतालिका तय गरेको छ । १२ साउनदेखि स्थानीय अधिवेशन सुरु हुँदैछ ।