काठमाडौं । नेपाल क्रिकेट संघ (क्यान) ले छ महिनाको केन्द्रिय करारको लागि पुरुष र महिला खेलाडीको वर्गीकरण गरेको छ ।
मंगलबार पोखरामा बसेको बोर्ड बैठकले २०२३ को जनावरी देखि जुनसम्म छ महिनाको लागि १८ पुरुष र १२ महिला गरी ३० खेलाडीहरुको वर्गीकरण गरेको हो । बैठकले ग्रेडिङअनुसार खेलाडीको पारिश्रमिक तोकेको छ ।
नयाँ ग्रेडिङमा पुरुषतर्फ ग्रेड ‘ए’मा ५, ग्रेड ‘बी’मा ३ र ग्रेड ‘सी’मा १० जना रहेका छन् । यस्तै, महिलातर्फ ग्रेड ‘ए’ र ग्रेड ‘बी’मा ३/३ जना रहेका छन् भने ग्रेड ‘सी’मा ६ जना छन् ।
क्यानको अनुसार पुरुषतर्फ ग्रेड ‘ए’मा रहेका खेलाडीले ६० हजार प्राप्त गर्नेछन् । ग्रेड ‘बी’ मा रहेका खेलाडीले ५० हजार र ‘सी’ ग्रेडका खेलाडीले ४० हजार पाउनेछन् । यस्तै, महिलातर्फ ग्रेड ‘ए’ का खेलाडीले २१ हजार प्राप्त गर्नेछन् भने ग्रेड ‘बी’ का खेलाडीले १८ हजार र ‘सी’ ग्रेडका खेलाडीले १५ हजार पाउनेछन् ।
पुरुषतर्फ ग्रेड ‘ए’मा रोहित पौडेल, सोमपाल कामी, करन केसी, दीपेन्द्रसिंह ऐरी र आशिफ शेख रहेका छन् भने ग्रेड ‘बी’मा आरिफ शेख, कुशल भुर्तेल र ज्ञानेन्द्र मल्ल छन्। यस्तै ग्रेड ‘सी’मा कमलसिंह ऐरी, विनोद भण्डारी, गुल्शन झा, अर्जुन साउँद, अविनाश बोहरा, ललितनारायण राजवंशी, कुशल मल्ल, देव खनाल, सागर ढकाल र विवेक यादव छन्।
यस्तै, महिलातर्फ ग्रेड ‘ए’मा रुविना क्षेत्री, सिता रानामगर र इन्दु बर्मा छन् भने ग्रेड ‘बी’मा काजोल श्रेष्ठ, कविता कुँवर र अस्मिना कर्माचार्य छन् । यस्तै, ग्रेड ‘सी’मा कविता जोशी, विन्दु रावल, सङ्गीता राई, ममता चौधरी, ज्योति पाण्डे र अप्सरी बेगम परेका छन् ।
