काठमाडौँ । सत्ता साझेदार दलहरुबीच शक्ति बाँडफाँटका विषयमा भएको छलफलमा नेकपा (एमाले) लाई चार वटा प्रदेशको मुख्यमन्त्री दिन नेकपा (माओवादी केन्द्र) का नेताहरु सहमत भएका छन् । छलफलअनुसार एमालेले प्रदेश १, बाग्मती, गण्डकी र कर्णालीको मुख्यमन्त्री पाउने सम्भावना छ । तर प्रदेश १ को मुख्यमन्त्रीमा माओवादीले पनि दाबी गरेको छ ।
प्रदेश १ मा माओवादीको प्रदेश कमिटीले मुख्यमन्त्रीमा दाबी गर्दै वार्ता समितिसमेत गठन गरेको छ । प्रदेश १ मा एमालेबाट संसदीय दलका नेता हिक्मत कार्की मुख्यमन्त्रीका आकांक्षी हुन् । प्रदेश १ मा एमाले ४० सिटसहित पहिलो दल हो भने माओवादीको १३ सिट छ । ९३ सदस्यीय प्रदेशसभामा सत्ता गठबन्धनको प्रष्ट बहुमत छ । त्यस्तै ११० सदस्यीय बाग्मती प्रदेशसभामा एमालेको २७ र माओवादीको २१ सिटले बहुमत पुग्दैन ।
यसमा एमालले राप्रपाको १३ सिटसहित समर्थन लिनुपर्ने हुन्छ । यहाँ पनि माओवादीका शालिकराम जम्मरकट्टेल, गंगा श्रेष्ठ, सरल सहयात्री मुख्यमन्त्रीका आकांक्षी हुन् । गण्डकी प्रदशेसभामा एमालेको २२ र माओवादी केन्दको ८ सिट छ । ६० सदस्यीय यो प्रदेशमा पनि सरकार गठन गर्न राप्रपाको समर्थन चाहिन्छ । एमालेले सरकारको नेतृत्व पाएको अवस्थामा स्थायी कमिटी सदस्य खगराज अधिकारी मुख्यमन्त्री बन्नेछन् ।
कर्णाली एमालेको भागमा परेमा यमलाल कँडेल मुख्यमन्त्री हुनेछन् । ४० सदस्यीय कर्णााली प्रदेशसभामा आवश्यक बहुमत (२१) सिट पुर्याउन माओवादी केन्द्रको १३ र एमालेको १० सिट पर्याप्त देखिन्छ । माओवादी केन्द्रले लुम्बिनी र सुदूरपश्चिमको मुख्यमन्त्री लिने सम्भावना रहेको छ । लुम्बिनीमा ८७ सदस्यीय प्रदेशसभा छ । यहाँ नागरिक उन्मुक्ति, जनमत, जनता समाजवादी लगायतका सबै दलले साथ दिएको अवस्थामा मात्र बहुमत पुग्छ । एमालेको २९, माओवादीको ९, राप्रपा र नागरिक उन्मुक्तिको ४/४, जनमत र जसपाको ३÷३ प्रदेश सभा सदस्य छन् ।
सुदूर पश्चिम प्रदेशसभामा ५३ प्रदेशसभा सदस्य छन् । जसमा माओवादीको ११ एमालेको १०, नागरिक उन्मुक्तिको ११ र राप्रपाको १ सिट छ । यो प्रदेशमा सरकारको नेतृत्व माओवादीले पाएमा प्रदेश अध्यक्ष समेत रहेका खगराज भट्ट मुख्यमन्त्री बन्ने सम्भावना छ । एक सय ७ सदस्यीय मधेस प्रदेशको नेतृत्वमा भने जनता समाजवादी र जनमत पार्टीबीच आलोपालो गर्ने गरी सहमति गर्ने प्रयास भएको छ । यहाँ एमाले २३, जसपाको १६, जनमतको १३ र माओवादी केन्द्रका ८ सांसद छन् ।
