जनकपुरधाम । दाइजोलाई निहुँ बनाएर घरबाट निकालिएकी नेहा चौधरी सासू र ससुरालाई पनि पक्राउ गर्नुपर्ने माग राख्दै सडक आन्दोलनमा सहभागी भएकी छन् । उनले महोत्तरीको रामगोपालपुर सडकमा बिहीबार बिहान सडकमा आन्दोलन सुरु गरेकी हुन् । आन्दोलनमा कुमारी आमा निहारिका राजपुत पनि सहभागी छन् । विद्यार्थी र केही युवाको सहयोगमा उनीहरु सडकमा टायर बालेर आन्दोलनमा सहभागी भएका हुन् ।
सडक आन्दोलनपछि रामगोपालपुर चोकमा सवारी साधन आवागमन रोकिएको छ । विभिन्न स्थानमा टायर बालिएको छ । नेहा आफैँले सडकमा गुड्ने सवारी साधनलाई रोकेकी छन् । गत वर्ष फागुनमा रामगोपालपुर–५ का पंकज चौधरीसँग नेहाको विवाह भएको थियो । नेहाका परिवारले दाइजो र विवाहमा करोडौँ रकम खर्च गरे पनि दाइजो पुगेन भन्दै पंकजको परिवारले नेहालाई यातना दिएको थियो ।
श्रीमान् पंकजबाटै कुटिएकी नेहालाई माइती पक्षले उद्धार गरी अस्पतालमा उपचार गरेको थियो । नेहाले श्रीमान् पंकजविरुद्ध सम्बन्ध विच्छेदको मुद्दा दर्ता गराएकी छन् । उनले श्रीमान्सहित सासू र ससुरालाई पनि पक्राउ गर्न माग गर्दै घरेलु हिंसा र दाइजोसम्बन्धी मुद्दा दर्ता गराएकी हुन् । सासू र ससुराले मंगलबार साँझ घर पस्न खोज्दा नेहालाई अवरोध गरेपछि धर्ना दिएकी थिइन् ।
प्रहरीले चिकित्सकसमेत रहेका पंकजलाई भने पक्राउ गरेर हिरासतमा राखेको छ । नेहाले सासू र ससुरालाई पक्राउ गरी कारबाही गर्नुपर्ने भन्दै आन्दोलन सुरु गरेकी हुन् । प्रहरीले बेलुकासम्म पक्राउ गर्ने आश्वासन दिए पनि पक्राउ नगरेपछि आन्दोलन सुरु गरेकी हुन् । नेहाका सासू र ससुरा घरमा ताल्चा लगाएर फरार छन् ।
