काठमाडौँ । स्याङ्जा निर्वाचन क्षेत्र नं २ र बाजुरामा पुनः मतदान नहुने भएको छ । निर्वाचन आयोगको आज बसेको बैठकले ती स्थानमा मतगणना सुरु गर्न निर्देशन दिएको छ ।
मतदान भई सिलबन्दी मतपेटिका निर्वाचन अधिकृतलाई बुझाइसकेको अवस्थामा प्रमुख दलहरु नेकपा (एमाले) र नेपाली कांग्रेसले एक अर्कामाथि धाँधलीको आरोप लगाउँदा स्याङ्जा–२ र बाजुरामा मतदान भएको १० दिनसम्म पनि मतगणना हुन सकेको छैन ।
स्याङजा–२ मा एमालेले कांग्रेसमाथि बुथ क्याप्चर गरेको आरोप लगाएको छ । चापाकोटमा मरेका मानिसहरुको नाममा समेत मतदान भएको, बुथ क्याप्चर गरिएको अनि विदेशमा भएकाहरुको नाममा समेत मतदान भएको भन्दै एमालेले अहिलेसम्मका प्रक्रिया रद्द गरेर फेरी मतदान हुनुपर्ने माग गरेको छ ।
स्याङ्जा–२ मा कांग्रेस उपसभापति धनराज गुरुङ र एमालेका पद्माकुमारी अर्यालबीच मुख्य प्रतिस्पर्धा छ ।
त्यस्तै बाजुराको बुढीनन्दामा मात्रै मतदान स्थगित भएको थियो । त्यहाँ भने कांग्रेस र एमालेले नै एक अर्कामाथि बुथ क्याप्चरको आरोप लगाउँदै केही ठाउँमा फेरी मतदान हुनुपर्ने माग गरेका छन् ।
बाजुरामा कांग्रेसका बद्रीप्रसाद पाण्डे र एमालेका कर्णबहादुर थापाबीच प्रतिस्पर्धा छ ।
