एजेन्सी । कतारमा जारी फिफा विश्वकप २०२२ को आज १० औं दिन हो । प्रतियोगितामा आज पनि चार खेल हुनेछन् । तर, आज खेलको समयमा परिवर्तन गरिएको छ र सबै खेल नेपाली समयानुसार राति खेलाइनेछ । विश्वकपमा आज मंगलबारबाट समूह चरण अन्तर्गतको अन्तिम चरणका खेलहरु सुरु हुनेछ ।
अब दुई खेल एकैसाथ खेलाइने भएको छ । पहिलो दुई खेल राति ८ः४५ बजे सुरु हुनेछन् भने बाँकी दुई खेल ढिलो गरी १२ः४५ बजे सुरु हुनेछन् ।
आज राति पौने ९ बजे बजे दुई खेल हुनेछन् । नेदरल्याण्ड्सले कतारसँग खेल्नेछ । त्यस्तै इक्वेडरले सेनेगलको सामना गर्नेछ । यसपछि राति १२ः४५ मा वेल्सको इंग्ल्याण्डसँग र इरानको अमेरिकासँग भिडन्त हुनेछ ।
पहिलो जितको खोजीमा कतार
आयोजक कतारले यस प्रतियोगितामा अहिलेसम्म कुनै पनि खेल जित्न सकेको छैन । कतारले आफ्नो अन्तिम खेल आज नेदरल्याण्डसँग खेल्नेछ । अन्तिम १६ को दौडबाट बाहिर भइसकेको कतार अन्तिम खेलमा जित निकालेर प्रतियोगिताको अन्त्य गर्न चाहन्छ ।
यद्यपि, कतारका लागि यो सहज हुनेछैन । कतार अहिलेसम्म सेनेगल र इक्वेडरसँग पराजित भएको छ भने अब उसले यस प्रतियोगितामा अपराजित रहेको नेदरल्यान्ड्ससँग खेल्दैछ । यी दुई टोली पहिलो पटक आमनेसामने हुँदैछन् । कतारले पछिल्ला पाँच खेलमा एउटामा मात्र जित हात पारेको छ भने नेदरल्यान्ड्स पछिल्लो पाँच खेलमा अपराजित छ । यीमध्ये चार खेलमा उसले जित निकालेको छ भने एक खेल बराबरीमा सकिएको छ ।
सेनेगल र इक्वेडरबीच कडा भिडन्त
समूह ‘ए’ मा आज इक्वेडरले सेनेगलको सामना गर्दैछ । दुवै टोली आ–आफ्नो समूहमा दोस्रो स्थानमा रहेर अर्को चरणमा पुग्ने प्रयास गर्नेछन् । नेदरल्याण्ड्स यस समूहबाट अन्तिम १६ मा पुग्ने निश्चित छ तर दोस्रो स्थानका लागि इक्वेडर र सेनेगलबीच कडा प्रतिस्पर्धा हुनेछ ।
यो खेल जित्ने टोली नकआउट चरणमा प्रवेश गर्नेछ । दुवै टोली पहिलो पटक एक अर्कासँग खेल्दैछन् । इक्वेडरले पछिल्ला पाँच खेलमा चार बराबरी खेलेको छ भने एकमा जित निकालेको छ । अर्कोतर्फ सेनेगलले पछिल्लो पाँच खेलमा तीन खेल जितेको छ । एउटा बराबरी भएको छ भने एउटामा हार ब्यहोरेको छ । यो खेल बराबरी भएमा इक्वेडरको टोली नकआउट चरणमा पुग्ने छ ।
जित निकाल्दै नकआउटमा पुग्न चाहन्छ इंग्ल्याण्ड
सन् १९६६ को विश्वकप उपाधि जितेको इंग्ल्याण्डले समूह चरणको अन्तिम खेल मंगलबार वेल्ससँग खेल्दैछ । ह्यारी केनको कप्तानीमा उत्रने इंग्ल्याण्डले यहाँ जित निकाल्यो भने नकआउटमा प्रवेश गर्नेछ । अर्कोतर्फ वेल्सलाई प्रतियोगितामा कायम रहन जित आवश्यक छ, अन्यथा यो टोली समूह चरणबाटै घर फर्किनेछ ।
पहिलो खेलमा इरानलाई ६–२ ले हराएको थियो इंग्ल्याण्डले दोस्रो खेलमा अमेरिकासँग गोलरहित बराबरी खेल्यो । सन् १९५८ पछि विश्वकप खेलेको वेल्सले इरानसँग २–० ले हार बेहोरेको थियो भने अमेरिकासँग १–१ को बराबरी खेलेको थियो । यस्तो अवस्थामा उसले कुनै पनि हालतमा खेल जित्नुपर्ने हुन्छ ।
अमेरिकालाई हार्न छुट छैन
अमेरिका र इरानको यो खेललाई राजनीतिक दृष्टिकोणबाट पनि हेरिएको छ । यो अमेरिकाका लागि ‘गर या मर’को खेल बनेको छ । यो जितले टोलीको फिफा विश्वकपमा नकआउट चरण प्रवेश गर्ने आशा जीवितै रहने छ । इङ्ल्यान्ड चार अंकसहित समूहको शीर्ष स्थानमा छ । यस्तै, तीन अंक जोडेको इरान दोस्रो स्थानमा रहँदा दुई अंकसहित अमेरिका तेस्रो र एक अंकका साथ वेल्स चौंथो स्थानमा छ ।
कार्लोस क्विरोज, इरानका प्रशिक्षक जो सन् १९९८ मा अमेरिकी फुटबल महासंघका सल्लाहकार थिए । यस सिजन च्याम्पियन्स लिगमा पाँच गोल गरेका मेहदी तेरेमीले इरानको आक्रमणको नेतृत्व गर्नेछन् ।
इरान यस विश्वकपमा आफ्नो उद्घाटन खेलमा इङ्ल्यान्डसँग २–६ ले पराजित भएको थियो । तर दोस्रो खेलमा वेल्सलाई २–० ले हराएर मनोबल बटुलेको इरान छ वटा विश्वकपमा पहिलो पटक अर्को चरणमा पुग्न चाहन्छ ।
खेल तालिकाः
इक्वेडर भर्सेस सेनेगल – ८ः४५ बजे
कतार भर्सेस नेदरल्याण्ड्स – ८ः४५ बजे
इरान भर्सेस अमेरिका – ००ः४५ बजे
वेल्स भर्सेस इंग्ल्याण्ड – ००ः४५ बजे
