हेटौंडा । मकवानपुरका किसानले खेती बाली लगाउने समयमा पनि मल नपाएको गुनासो गरेपछी जिल्लाको क्षेत्र नम्बर–२ का सांसद महेश कुमार बर्तौला कृषि सामाग्री कम्पनि लिमिटेडको मल गोदाममै गएर निरिक्षण गरेका छन् ।
सोमबार सांसद बर्तौला साल्ट ट्रेडिङ कर्पोरेशनको कार्यालय तथा कृषि सामग्री लिमिटेडको गोदाममा पुगेका हुन् ।
संघीय सांसदको रुपमा निर्वाचित भएपछी उनले निर्वाचन अधिकृतको कार्यालयमा पुगेर प्रमाणपत्र लिने बित्तिकै किसानले समयमानै मल नपाएको गुनासो बढेपछि तत्काल मल वितरण गर्न निर्देशन दिन उनी एक्शनमा उत्रिएका हुन् ।
कृषि सामाग्री कम्पनि लिमिटेको हेटौंडा–२ शिद्धार्थ रोड स्थित गोदाममा गएर उनले निरिक्षण गर्दै तत्काल किसानलाई मल वितरण गर्न निर्देशन दिए ।
निर्वाचनमा उम्मेदवारी दिएका बेलामा हरेक समस्यामा आफू साथै रहेको उद्घोष गरेका बर्तौलाले आजैबाट आफ्ना क्षेत्रका नागरिकको समस्यामा सहजीकरणको काम सुरु गरेका हुन् ।
मकवानपुर जिल्लाका दश वटा स्थानीय तहका लागि वितरणका लागि ल्याइएको मल गोदाममै थन्किएको छ । तर, स्थानीय तहका कर्मचारी र सहकारी संस्थाहरुका कारण समयमानै मल वितरण गर्न थप समस्या भएको कृषि सामाग्री कम्पनि लिमिटेडका प्रमुख प्रकाश ज्ञवालीले सांसद बर्तौला समक्ष बताए ।
किसानलाई आवश्यक परेको समयमा तत्काल मल वितरण गर्ने वातावरण तयार गर्नका लागि सांसद बर्तौलाले निर्देशन दिएका छन् ।
