काठमाडौँ । कतारमा जारी फिफा विश्वकप फुटबल अन्तर्गत समूह ‘जी’ को खेलमा क्यामरुन र सर्बियाले बराबरी खेलेका छन् । अल जानोउव मैदानमा भर्खरै सम्पन्न खेलमा दुबै टिमले ३–३ गोलको बराबरी खेल्दै अंक बाँडेका हुन् ।
१० औं मिनेटमा सर्बियाका फरवार्ड अलेक्सान्डर मित्रोभिचले प्रहार गरेको बल क्यामरुनको पोस्टमा ठोकिएर बाहिरिन पुग्यो । उनले डि–बक्स भित्रबाट देब्रे खुट्टाले प्रहार गरेको बल देब्रे पोलमा ठोकिन पुगेको थियो । १७ औं मिनेटमा मित्रोभिचले गोल गर्ने सुनौलो अवसर गुमाए । क्यामरुनका डिफेन्डरबीच तालमेल नमिन्दा मित्रोभिचले गोल गर्ने मौका पाएका थिए । तर उनले पोस्ट बाहिर प्रहार गरे । बललाई सही दिशा दिन सकेनन् ।
१९ औं मिनेटमा क्यामरुनका पिएरे कुन्डेले प्रहार गरेको बललाई सर्बियाका गोलकिपर भान्जा मिलिकोन्भिचले पञ्च गरेर सानदार बचाउ गरे । ४२ औं मिनेटमा पुनः कुन्डेले प्रहार गरेको बललाई गोलकिपर मिलिकोन्भिचले पुनः रोके । २९ औं मिनेटमा जिन चाल्र्स कास्टेलेटोले गोल गर्दै क्यामरुनलाई १–० को सुरुवाती अग्रता दिलाए । कर्नरबाट प्राप्त बललाई तयारी अवस्थामा रहेका उनले सजिलै ‘ट्यापिङ’ गरेर गोल गरे ।
पहिलो हाफको इन्जुरी समयमा सर्बियाले खेल बराबरी गर्यो । सर्बियाका लागि स्ट्राहिन्जा पाब्लोभिचले गोल गर्दै खेललाई १–१ को बराबरीमा ल्याए । डुसान टाडिचले फ्रिकिकबाट प्रहार गरेको बललाई हेडरमार्फत उनले सानदार गोल गरे ।
यस्तै, इन्जुरी समयको ४५+३ मिनेटमा मिलिन्कोभिच सेभिचले गोल गर्दै सर्बियालाई २–१ को अग्रता दिलाए । डि–बक्स भित्रबाट उनले क्यामरुनका डिफेन्डरलाई बिट गर्दै उत्कृष्ट गोल गरे । ५३ औं मिनेटमा मित्रोभिचले गोल गर्दै सर्बियालाई ३–१ को अग्रता दिलाए । डुसान टाडिचले उपलब्ध गराएको पासलाई उनले खेर जान दिएनन् ।
६३ औं मिनेटमा भिन्सेन्ट अबुबाकारले गोल गर्दै क्यामरुनलाई २–३ को स्थितीमा ल्याए । उनले सर्बियाका गोलकिपर अगाडि आएको अवस्थामा ‘चिप’ गोल गरे । ६६ औं मिनेटमा एरिक माक्सिम मोटिङले गोल गर्दै क्यामरुनलाई ३–३ को बराबरीमा ल्याए ।
७६ औं मिनेटमा सर्बियाका मित्रोभिचले गोल गर्ने अवसर गुमाए । उनले प्रहार गरेको बललाई क्यामरुनका गोलकिपर डेभिस इपासेले विफल पारे । ८८ औं मिनेटमा सर्बियाका फिलिप कोस्टिचले प्रहार गरेको बल सिधा क्यामरुनका किपर इपासेको हातमा पुग्यो । बराबरीसँगै दुई खेलबाट एक–एक अंक जोडेका क्यामरुन अंकतालिको तेस्रो स्थानमा र सर्बिया पुछारमा रहेको छ ।
