एजेन्सी । कतारमा जारी फिफा विश्वकप फुटबलमा मोरक्कोसँग २–० ले पराजित भएपछि बेल्जियममा दंगा मच्चिएको छ । राजधानी ब्रसेल्समा फ्यानहरूले तोडफोड र गाडीमा आगजनी गरेका छन् ।
आक्रोशित समर्थकलाई नियन्त्रणमा लिन प्रहरीले अश्रुग्यास र पानीको फोहोरा प्रयोग गर्नुपरेको थियो । १२ जनालाई हिरासतमा लिइएको प्रहरीले जनाएको छ ।
हातमा मोरक्कोको झण्डा लिएर केही फ्यानले तोडफोड गरिरहेका थिए । केही प्रदर्शनकारीले कार र केही विद्युतीय स्कुटरमा आगजनी गरेका छन् । धेरै ठाउँमा दंगा भएको छ ।
हिंसा भड्किएपछि ब्रसेल्सका मेयर फिलिप क्लोसले मानिसहरूलाई सहरहरूमा भेला नहुन अपील गरेका छन् ।
मोरक्कोको विजय पछि, मोरक्कन मूलका केही समर्थकहरूले ब्रसेल्समा उत्सव मनाए । त्यसपछि बेल्जियमका समर्थकसँग उनको झडप भएको थियो । यहीँबाट हिंसा भड्कियो र दंगामा परिणत भयो । बेल्जियममा मोरक्कन मूलका करिब ५,००,००० मानिस बसोबास गर्छन् ।
बेल्जियममा भएको हिंसाको प्रभाव छिमेकी नेदरल्याण्डमा पनि देखिएको छ । दंगा विरोधी अधिकारीहरूले करिब ५०० जनाको फुटबल समर्थक समूहलाई रोक्न खोजेका थिए । उनीहरुले प्रहरीमाथि ढुंगामुढा गर्ने, आगजनी र तोडफोड गर्नेजस्ता क्रियाकलाप गरेका थिए । घटनामा दुई प्रहरी घाइते भएका छन् ।
आइतबार भएको खेलमा विश्व वरियताको दोस्रो नम्बर टोली बेल्जियमले एक गोल पनि गर्न सकेन । बेल्जियम २२औं वरियताको टोली मोरक्कोसँग २–० ले पराजित भएको थियो ।
