काठमाडौं । कतारमा जारी फिफा विश्वकप फुटबलमा इरानले पहिलो जित निकालेको छ । शुक्रबार अहमद बिन अलि स्टेडियममा सम्पन्न खेलमा १० खेलाडीमा समेटिएको वेल्सलाई इरानले २–० गोल अन्तरले हराएको हो ।
इरानको जितमा रौजबेह चेस्मी र रामिन रिजाइनले एक–एक गोल गरे । इरानले दुबै गोल खेलको इन्जुरी समयमा गरेको हो । खेलको ९८ औं मिनेटमा चेस्मीले तथा १०१ औं मिनेटमा रामिनले गोल गरे । खेलको ८६ औं मिनेटमा वेल्स १० खेलाडीमा समेटिन पुग्यो ।
इरानका तारेमी मेहदीलाई पेनाल्टी क्षेत्रबाहिर फउल गरेपछि भीएआरको सहायताले रेफ्रीले वेल्सका गोलकिपर वायन हेनेसीलाई रातो कार्ड देखाउँदै मैदान बाहिर पठाएका थिए ।
जितसँगै इरानले समूह ‘बी’मा २ खेलमा ३ अंक जोड्दै दोस्रो स्थानमा उक्लिएको छ । वेल्स समान खेलबाट १ अंकसहित पुछारमा छ । यस्तै, १ खेलमा ३ अंकसहित इंग्ल्याण्ड शीर्षस्थानमा रहँदा १ खेलबाटै १ अंक जोडेको अमेरिका तेस्रो स्थानमा छ ।
