काठमाडौं । जापानमा जारी ओलम्पिक खेलकुदमा अमेरिकाले चीनसँगको स्वर्ण पदकको दुरीलाई घटाएको छ । अन्तिम दिन भएको पाँच स्पर्धामा अमेरिकाले तीन स्वर्ण पदक जित्यो । पुरुषको मेड्ली रिलेमा अमेरिका  नयाँ विश्व कीर्तिमान सहित स्वर्ण पदक जित्न सफल भएको छ  । सो स्पर्धामा बेलायतले  रजत तथा इटालीले कांस्य पदक जिते । 

अमेरिकाकै केलेब ड्रेसेलले ५० मिटर फ्रिस्टाइलमा स्वर्ण पदक जिते । उनको यो ओलम्पिकमा पाँचौँ स्वर्ण पदक हो । सो स्पर्धामा फ्रान्सका फ्लोरेन्स मालाउडुले रजत ब्राजिलका ब्रुनो फ्राटसले कांस्य पदक जिते । महिलाको ५० मिटर फ्रिस्टाइलमा अस्ट्रेलियाकी अम्मा म्याककोनले स्वर्ण स्विडेनकी सहारा  जोर्सटमले रजत तथा डेनमार्क पेरेलीम ब्रुमले कांस्य पदक जिते । म्याककोनको यो चौथो ओलम्पिक स्वर्ण पदक हो । 

महिलाको मेड्ली रिलेमा पनि अस्ट्रेलियाले अमेरिकालाई हराउँदै स्वर्ण पदक जित्न सफल भयो ।  क्यानडाले कांस्य पदक जित्यो । 
पुरुष १५०० मिटरमा अमेरिकाका बबी फीन्केले स्वर्ण पदक जिते । सो स्पर्धामा युक्रेनका मिखायल रुमान्चुकले रजत तथा जर्मनीका फ्लोरेन्स उलबर्गले कांस्य पदक जिते । एथलेटिक्समा महिला सट पुटमा चीनकी गोग लीजाओले स्वर्ण,अमेरिकाकी राभेन सान्डर्सले रजत तथा न्युजील्यान्डकी भालेरी एडम्सले कास्य पदक जिते । 

आइतबार हुने एथलेटिक्सको महिला ट्रिपल जम्पमा भेनेजुएलाकी रोजास युलिमार बलियो दाबेदार रहेकी छिन् । पुरुष १सय मिटर  दौडमा टोमस ब्रोमेल बलियो दाबेदारको रूपमा हेरिए पनि हिट चरणमा आफ्नै हिटमा चौथो  भएर वेस्ट  लुजरको आधारमा उनी सेमिफाइनल प्रवेश गरे पछि यो अनुमानको बारे पनि धेरेको आशङ्का रहन थालेको छ । 
ब्याडमिन्टनको महिला एकलमा शीर्ष बरीयताकी चीनकी चेन यु फाइ र दोस्रो बरीयताकी चाइनिज  ताइपेइकी ताइ झु यींगका बिच खेल हुने छ । 

साइक्लिङको बिएम एक्स फ्रिस्टाइलमा महिला र पुरुषकै फाइनल  आइतबार हुने छ । डाइभिङको तीन मिटर स्प्रिङ बोर्डको फाइनल हुने छ । यस स्पर्धामा चीनको स्वर्ण पदक लगभग निश्चित मानिएको छ ।  फेन्सिङमा पुरुष टिम  फोइलको पदकको टुङ्गो आइतबार नै लाग्ने छ । 

सेलिङमा महिला र पुरुषकै वान पर्सन डेन्हेको  पदकको टुङ्गो लाग्ने छ । टेनिसमा आइतबार तीन स्वर्ण पदकको टुङ्गो लाग्ने छ । महिला युगलमा चेक गणतन्त्रका क्रेजीकोभा र साइनाकोभाको बिचमा खेल हुने छ । पुरुष एकलमा जर्मनीका अलेक्जेन्डर जाभेरेभ र रुस अ‍ोलिम्पक कमिटीका खाचेनीकोभ कारेनको बिचमा खेल हुने छ ।  मिश्रित युगलमा दुई रुसी जोडी फाइनलमा प्रवेश गरेका छन्  । 

भारोत्तोलनको ७६ किलोको स्पर्धा हुने छ । इक्वेडरकी डोल्मेस बारिया यस खेलको महत्त्वपूर्ण खेलाडीको रूपमा रहेकी छिन्  । अहिले चीनको २२ तथा अमेरिकाको १९ स्वर्ण पदक रहे पनि साँझसम्म यो अन्तर बढ्ने सक्ने सम्भावना प्रबल छ ।