काठमाडौंः युवाले नेतृत्व गरेका नयाँ दल र स्वतन्त्र उम्मेदवारले निकै ठूलो दबाब सिर्जना गरेपनि अधिकांश स्थानमा ठूला र स्थापित दलले नै मतगणनामा अग्रता लिन थालेको पाइएको छ ।
मतगणनाको पछिल्लो विवरणमा नेपाली काँग्रेस, नेकपा एमालेले सबैभन्दा बढी स्थानमा अग्रता कायम गरेका छन् । नेकपा एमालेले अपराह्न ४ बजेसम्म कूल ४४ स्थानको मतगणनामध्ये १५ स्थानमा अग्रता बनाएर पहिलो स्थानमा छ ।
दोस्रो स्थानमा रहेको नेपाली काँग्रेसले १ स्थान (मुस्ताङ)मा विजय बाहेक अरु १२ स्थानमा अग्रता कायम गरेको छ ।
अर्थात् परम्परागत दुई ठूला दलले ४४ मध्ये २८ स्थानमा अग्रता कायम गरेका छन् ।
तेस्रो स्थानमा भने रबि लामिछानेले नेतृत्व गरेको राष्ट्रिय स्वतन्त्र पार्टीले ६ स्थानमा अग्रता बनाइरहेको छ जसलाई सबैले आश्चर्यजनक परिणामका रुपमा लिएका छन् ।
राष्ट्रिय प्रजातन्त्र पार्टीले ३, सिके राउतले नेतृत्व गरेको जनमत पार्टीले २, नेकपा माओवादी केन्द्रले १ तथा अन्यले ४ स्थानमा अग्रता बनाएका छन् ।
मतदान सम्पन्न भएका सबैजसो स्थानमा मतगणना जारी छ । मतगणनाको पछिल्ला नतिजा न्यूजपोलारले नियमित रुपमा अपडेट गरिरहेको छ ।
